१८ कात्तिक, रुकुम पूर्व । भूमे गाउँपालिका– ६ धरमशालाकी ज्येष्ठ नागरिक जुनसरा रोका ७३ वर्षका उमेरमा नागरिकता पाएपछि खुशी हुनुहुन्छ ।
उहाँ भन्नुहुन्छ, “डाँडामाथिको घाम जस्तो भएको यो उमेरमा आएर नागरकिता पाउँछु, भन्ने त सोचेकै थिइन । आशै मरिसकेको थियो । नागरिकता नभएकै कारण सामाजिक सुरक्षा भत्ता पाएको थिइन । खुशी लागेको छ ।”
सजिलै हिँडडुल गर्न तथा सदरमुकामसम्म पुग्न गाह्रो भएको अवस्थामा नागरिकता घुम्ती शिविरबाट गाउँमै नागरिकता पाएका अपाङ्गता भएका व्यक्ति सूर्य बुढाले पनि खुशी व्यक्त गर्नुभयो ।
भूमे गाउँपालिका– ६ धरमशालामा नागरिकता वितरणसम्बन्धी एकदिने घुम्तीसेवा शिविर सञ्चालन गरिएको थियो । शिविरमार्फत त्यस ठाउँका ३५ जनाले नागरिकता लिएको प्रमुख जिल्ला अधिकारी मित्रलाल शर्माले जानकारी दिनुभयो, जसमा महिला २४ पुरुष ११ रहेका छन् ।
गाउँपालिका अध्यक्ष रामसुर बुढा मगरले विकट बस्तीबाट सदरमुकाम पुग्न कम्तीमा पनि चार दिन हिँड्नुपर्ने अवस्थामा नागरिकताबाट नागरिक वञ्चित नहोऊन् भन्नाका लागि शिविरले काम गरेको बताउनुभयो ।(रासस)
