९ असोज, काठमाडौँ । प्रतिनिधिसभाको आजको बैठकले शान्ति विश्वविद्यालय स्थापना गर्नेसम्बन्धी अन्तर्राष्ट्रिय सम्झौताको सम्मेलन गर्ने प्रस्ताव सर्वसम्मतिले स्वीकृत गरेको छ ।
प्रतिनिधिसभाको आजको बैठकमा परराष्ट्रमन्त्रीका तर्फबाट गृहमन्त्री रामबहादुर थापाले उक्त प्रस्ताव प्रस्तुत गर्नुभएको थियो । प्रस्तावमाथि छलफलका क्रममा उठेका जिज्ञासामा गृहमन्त्री थापाले विश्वविद्यालयले शान्ति स्थापनाका लागि महत्वपूर्ण भूमिका खेल्ने बताउनुभयो ।
सांसद खगराज अधिकारी, प्रेस सुवाल, पुष्पा भुसाल, नवराज सिलवाल, देवप्रसाद गुरुङ, राधाकुमारी ज्ञवाली, सरिता गिरी, अञ्जना विशङ्खे, सत्या पहाडीलगायतले सरकारले सो प्रस्ताव ल्याएर राम्रो काम गरेको बताउनुभएको थियो ।
बैठकमा सभामुख कृष्णबहादुर महराले राष्ट्रपतिको कार्यालयबाट प्राप्त विधेयक प्रमाणीकरणसम्बन्धी र कावा प्रधानमन्त्रीम ईश्वर पोखरेललाई तोकिएको सम्बन्धी पत्रको व्यहोरा पढेर सुनाउनुभएको थियो । सदनमा अन्तर्राष्ट्रिय सम्बन्ध समितिका सभापति पवित्रा निरौलाले ‘राहदानी विधेयकसम्बन्धी समितिको प्रतिवेदन, २०७५’ पेश गर्नुभयो ।
बैठकमा प्रतिनिधिसभाका सचिव गोपालनाथ योगीले ‘मुलुकी संहितासम्बन्धी केही नेपाल ऐनलाई संशोधन गर्ने विधेयक, २०७५’ का सम्बन्धमा राष्ट्रियसभाबाट प्राप्त सन्देशसहितको विधेयक टेबुल गर्नुभएको थियो । प्रतिनिधिसभाको अर्काे बैठक यही असोज १० गते अपराह्न २ बजे बस्नेछ ।(रासस)
