चैत्र २३, २०७२- पर्साको निर्मलबस्तीस्थित नेपाल राष्ट्रिय उच्च माध्यमिक विद्यालय केन्द्रमा एसएलसी दिइरहेका विद्यार्थी बिरामी परेका छन् ।
परीक्षास्थलमै स्लाइन र अक्सिजन लगाएर उनीहरुले परीक्षा दिइरहेका छन् । मगंलबार ६ जना छात्र/छात्रा बिरामी परेका छन् । सोमबार ७ जना बिरामी परेका थिए । आज जिल्ला शिक्षा अधिकारी रामविनय कुमार सिंह, जनस्वास्थ्य र चिकित्सकको टोली केन्द्रमा पुगेका छन् ।
विद्यार्थीमा पेट दुख्ने, सास रोकिने, ब्लड प्रेसर कमको समस्या देखिएको छ । परीक्षाको बेला त्रास र तनावमा रहेका विद्यार्थी बिहान खाली पेट परीक्षा दिन आउँदा बिरामी परेको डा. जावेद अख्तरले बताए । परीक्षा कोठामा क्रस भेन्टिलेसन पनि छैन् ।
सदरमुकाम वीरगन्जबाट करिब ४२ किलोमिटर दुरिमा रहेको केन्द्रमा ३ विद्यालयका २ सय ४० जना विद्यार्थीले एसएलसी दिइरहेका छन् ।
