९ असार, काठमाडौं । प्रहरीले ‘गुण्डा नाइके’ जसवन्त भन्ने पूर्ण राईलाई गोली हानेर पक्राउ गरेको छ ।
महानगरीय प्रहरीको अपराध महाशाखाले उनलाई बिहीबार दिउँसो विजुलीबजारबाट पक्राउ गरेको हो ।
पक्राउ गर्ने क्रममा प्रहरीमाथि उनले रडले आक्रमण गरेपछि गोली चलाउनु परेको प्रहरीले जनाएको छ ।
उनको खुट्टामा दुई राउण्ड गोली लागेको छ । अहिले उनको वीर अस्पतालमा उपचार भइरहेको छ ।
राईविरुद्ध कालिमाटी, कलंकी क्षेत्रका होटल रेष्टुँराहरुमा धम्क्याएर रकम उठाउने गरेको भन्दै उजुरी परेको महाशाखा प्रमुख सर्वेन्द्र खनालले बताए ।
चार दिन अघि उनले हप्ता नदिएको भन्दै कालीमाटी आसपासका तीन जनालाई कुटपिट गरेका थिए । उनी यसअघि पनि ज्यान मुद्दा र सार्बजनिक अपराधका मुद्दामा सजायँ पाइसकेका व्यक्ति रहेको बताइएको छ।
