![दुर्घटना](https://i0.wp.com/nepalpatra.com/wp-content/uploads/Accident-12-1.jpg?fit=770%2C351&ssl=1)
मान्म । कालिकोट जिल्लामा जीप दुर्घटना हुँदा चालकसहित ३ जनाको मृत्यु भएको छ । कालिकोटको शुभकालीका गाउँपालिका–६, गविरामा लु १ च ८४९८ नम्बरको जीप दुर्घटना हुँदा ३ जनाको मृत्यु भएको हो ।
जिप कालीकोटको बेउली पान्तडी सडकखण्डको चौकी बजारबाट हाउडी हुँदै शुभकालिकातर्फ जाँदै गर्दा शुभकालिका–६ गविराममा हिजो शनिबार राति साढे ११ बजेको समयमा दुर्घटना भएको जिल्ला प्रहरी कार्यालय कालीकोटले जनाएको छ । उक्त जीप सडकदेखि १५० मिटर तल खसेको प्रहरीले बताएको छ ।
दुर्घटनामा परेर जिप चालक शुभकालिका–२ का ३० वर्षीय हर्क विश्वकर्मा, शुभकालिका–८ का ३१ वर्षीय रामबहादुर शाही र दैलेख नौमुले–३ का २५ वर्षीय गोपाल सलामीमगरको मृत्यु भएको जिल्ला प्रहरी कार्यालय कालीकोटका प्रहरी प्रमुख जयश्वर रिमालले जानकारी दिए ।
दुर्घटनाको कारण खुल्न नसकेको र घटनाबारे अनुसन्धान भइरहेको उहाँले बताए । “घटना मध्यराति भएकाले दुर्घटनाको कारण खुल्न सकेको छैन्”, प्रहरी प्रमुख रिमालले भने, “जिपमा सवार तिनै जनाको मृत्यु भएको, देख्ने र घाइते अन्य नभएकाले पनि दुर्घटनाका कारण खुल्न सकेन ।”