११ जेठ, ललितपुर । सेवा र जनशक्ति पर्याप्त नहुँदा गोदावरी–१० स्थित बज्रबाराही सामुदायिक अस्पतालमा प्रसूति सेवा लिन आउने महिलाको संख्या घटिरहेको छ ।
अस्पतालमा सामान्य प्रसूति सेवादेखि शल्यक्रियासम्म हुँदा मात्रै सेवाग्राही आउने निमित्त कार्यक्रम निर्देशक गणेशराज श्रेष्ठले बताउनुभयो । अस्पतालमा अहिले सामान्यबाहेक अरु सेवा छैन ।
अस्पतालमा भवन भएपनि जटिल उपचारका लागि उपकरण छैन । नेपाल सरकारले लागू गरेको ‘आमा सुरक्षा कार्यक्रम’ लागू भएका ठाउँमा २४ घण्टे सेवा उपलब्ध हुनुपर्छ । उहाँ भन्नुहुन्छ, “जनशक्तिको कमीले गर्दा हामीले गर्न गाह्रो भएको छ ।” अस्पतालमा जम्मा सातजना मात्रै कर्मचारी रहेका छन् ।
प्रत्येक महिना १६÷१७ जनासम्म बिरामी सेवा लिन आइरहेका छन् । यो संख्या चार÷पाँच वर्ष पहिलेभन्दा कम हो । पहिले महिनामा ३५ जनासम्म महिलाले यहाँ प्रसूति सेवा लिएका थिए । सबै खालका सेवा आफूसँग नहुँदा जोखिम लिन नसकिने श्रेष्ठ बताउनुहुन्छ ।
उहाँ भन्नुहुन्छ, “भ्याकुमनै गरेर बच्चा निकाल्नु पर्दा पनि हामीसँग उपकरण छैन ।” जिल्ला अस्पतालको निर्णय भए पनि सीमितबाहेक कर्मचारी र स्रोत आइसकेको छैन ।
पहिले भएको एम्बुलेन्ससमेत सञ्चालन गर्न नसक्दा त्यसको असर सबै खालका सेवासँगै प्रसूति सेवामा समेत परेको अस्पतालले जनाएको छ ।(रासस)
