धरान । धरानमा एक हाेटलकाे कोठा भित्र महिलाको शव फेला परेको छ । धरान उपमहानगरपालिका-१८ बुद्धचोकस्थित न्यू कान्तिपुर होटल एण्ड गेष्ट हाउसमा एक महिलाको शव फेला परेको हो ।
सो होटलको कोठा नम्बर १०९ मा दुई दिनदेखि एक पुरुष र ती महिला बसिरहेकामा महिलाको शव भेटिएको इलाका प्रहरी कार्यालय धरानले जनाएको छ । आज बिहान कोठा सफा गर्न गएका होटलका कर्मचारीले शव देखेपछि प्रहरीलाई खबर गरेका थिए ।
यद्यपि महिलासँगै बसेका पुरुष भने फरार रहेको प्रहरीले जनाएको छ । उनले हत्या गरेको हुनसक्ने आशंका गरिएको छ । महिलाको अनुहारमा चोटसमेत देखिएको छ ।
मृतक महिलाको सनाखत हुन नसकेकाे पनि उनको साथबाट पाँचथर मिक्लाजुङ ठेगाना उल्लेख भएको सुमित्रा तामाङ नामको नागरिकता फेला परेसँगै सोही आधारमा सनाखत गर्न परिवार तथा आफन्तजनको खोजी भइरहेको कार्यालयले जनाएको छ ।
प्रहरीका अनुसार महिलाको शव भेटिएको र उनको सनाखत गर्न परिवार तथा आफन्तजनको खोजी भइरहेको छ । आफन्तजन आएपछि मात्र शव हेर्ने, घटना प्रकृति मुचुल्का गरिने प्रहरीले बताएको छ ।
