रुकुम पूर्व, ३१ असार । रुकुम (पूर्व) मा दहमा डुबेर १ जना बेपत्ता भएका छन् । सिस्ने गाउँपालिका वडा नम्बर १ मा रहेको गुप्ता दहमा डुबेर लजिम बुढा बेपत्ता हुनुभएको हो ।
भैँसीखर्क जानुभएका १८ वर्षीय बुढा आज पौडी खेल्ने क्रममा डुबेर बेपत्ता हुनुभएको वडा नम्बर १ का वडाध्यक्ष मानबहादुर बुढाले जानकारी दिनुभयो । बर्खाका समयमा लेकतिर गाईभैँसी लिएर खर्क जाने प्रचलन छ । वडा नम्बर १ भट्टेचौरबासी उहाँ गुप्ता दहको खर्कमा भैँसी चराउन जानुभएको थियो ।
वडाध्यक्ष बुढाका अनुसार पौडी खेल्न गएकामध्ये सिर्जन बुढा बाँच्न सफल भएको तर लजिम डुबेर बेपत्ता भएका छन् । अहिले स्थानीयवासीले लजिमको खोजी गरिरहेका छन् भने प्रहरीलाई पनि खबर गरिएको अध्यक्ष बुढाले बताउनुभयो । सडक सुविधा नभएको उक्त ठाउँमा जिल्ला सदरमुकाम रुकुमकोटबाट जान हिँडेर दुई दिन लाग्छ ।
