१ माघ , कपिलवस्तु । लाखौँको चिठ्ठा परेको भन्दै भाइबर तथा ह्वाट्सएपवाट ठगी गर्ने १ जनालाई कपिलबस्तु प्रहरीले पक्राउ गरेको छ । पक्राउ पर्नेमा कपिलबस्तुको कृष्णनगर नगरपालिका वडा नं. ३, झण्डिनगरका ३३ वर्षीय सन्तोष कुमार गुप्ता बानिया रहेका छन् ।
प्रहरीले कृष्णनगरमा रहेको सिद्धार्थ बैंक लिमिटेडवाट उनलाई पक्राउ गरेको हो । विभिन्न व्यक्तिलाई फोन गरी तपाईंले चलाएको भाइबर, फेसबुक, ट्विटर तथा सिम कार्डबापत ४० लाख रुपैयाँ लट्री जित्नु भएको छ भनी फोन तथा म्यासेज गरी उनले प्रलोभनमा पार्ने गरेका थिए ।
लट्री बापतको कर नेपाल सरकारलाई जम्मा गरे पछिमात्र उक्त रकम तपाईंको खातामा जम्मा हुने बताई आइएमई तथा विभिन्न बैंकमार्फत पैसा पठाउन लगाई उनले ठगी गरेको प्रहरीले जनाएको छ।
