झापा । सडक दुर्घटनामा परी आज यहाँ २ जनाको मृत्यु भएको छ । मृत्यु हुनेमा शिवसतासी नगरपालिका-४ का २७ वर्षीय सरोज कार्की र बाह्रदशी गाउँपालिका-५ की ४३ वर्षीया कलसावती राजवंशी रहेको जिल्ला प्रहरी कार्यालयले जनाएको छ । छुट्टाछुट्टै दुर्घटनामा परी उनीहरुको मृत्यु भएको हो ।
आज अपराह्न कमल गाउँपालिका-१ बालुबारीस्थित क्याम्पमा ना १ त ६१६५ नम्वरको टिपरले विपरीत दिशाबाट आउँदै गरेको मे ३ प ३७४७ नम्वरको मोटरसाइकललाई ठक्कर दिँदा मोटरसाइकल चालक कार्कीको घटनास्थलमै मृत्यु भएको थियो ।
साथै बाह्रदशी गाउँपालिका-५ कनकन मार्गमा मे ११ प ८४५१ नम्वरको स्कुटी आफैँ अनियन्त्रित भई दुर्घटना हुँदा स्कुटी चालक राजवंशी घाइते भएको थियो । उनको उपचारका क्रममा विर्तामोडस्थित विएण्डसी अस्पतालमा मृत्यु भएको प्रहरीले जनाएको छ ।
जिल्ला प्रहरी कार्यालयका प्रवक्ता राकेश थापाले दुर्घटना न्यूनीकरणका लागि सचेतनामूलक कार्यक्रम भइरहे पनि दैनिक सवारी दुर्घटनामा पछिल्लो समय मृत्यु हुनेको सङ्ख्या बढिरहेको बताए ।
