दोलखा, साउन ३ । दोलखा जिल्लाको मेलुङ गाउँपालिकाको पवटीमा यात्रुबहाक बस दुर्घटना हुँदा ३ यात्रु गम्भीर घाइते भएका छन् । मेलुङ गाउँपालिका-१ पवटीमा भएको उक्त दुर्घटनामा आधा दर्जन बढी घाइते भएका छन् ।
पवटीको सिम्टेबाट चरिकोटतर्फ आउँदै गरेको बा ५ ख ६५९० नम्बरको बस दुर्घटनामा परेको हो । बसमा १९ जना सवार रहेको बताइएको छ । गम्भीर घाइतेहरुको अहिले सदरमुकाम चरिकोटस्थित प्राथमिक स्वास्थ्य उपचार केन्द्रमा उपचार भईरहेको छ ।
बस सडकबाट करिब १० मिटर तल खसेको प्रहरीको भनाई छ । सामान्य घाइते भएको ६ जनालाई पनि प्राथमिक स्वास्थ्य केन्द्र चरिकोटमा ल्याइएको प्रहरीले जनाएको छ । दुर्घटनाग्रस्त गौरीशंकर यातायातका चालक र सहचालक सम्पर्क विहीन रहेको र गाडी धनीको समेत खोजी भइरहेको असई दुलालले जानकारी दिए ।
