१ जेठ, काठमाडौं । नेपालमा आज राती फेरि कोरोना भाइरस (कोभिड-१९) संक्रमण थप नयाँ ३ जनामा पुष्टि भएको छ । योसँगै नेपालमा कोरोना संक्रमितको संख्या २४९ पुगेको छ । स्वास्थ्य तथा जनसंख्या मन्त्रालयका सह-प्रवक्ता डा. समीर कुमार अधिकारीले एक प्रेस विज्ञप्ति जारी गर्दै सो कुराको जानकारी दिएका हुन् ।
काठमाडौँको टेकुस्थित राष्ट्रिय जनस्वास्थ्य प्रयोगशालामा गरिएको परीक्षणमा थप नयाँ ३ जनामा संक्रमण पुष्टि भएको हो । मन्त्रालयका अनुसार काठमाडौं, धनुषा र धादिङमा कोरोना संक्रमित भेटिएका हुन् ।
मन्त्रालयका अनुसार काठमाडौंको दहचोक निवासी ७ वर्षीय बालक, धनुषाको जनकपुर निवासी १७ वर्षीया युवती र धादिङ निवासी ३० वर्षीया महिलामा कोरोना संक्रमण पुष्टि भएको छ । मन्त्रालयका सह-प्रवक्ता डा. अधिकारीका अनुसार हालसम्म प्राप्त विवरणमा उनीहरुको स्वास्थ्य सामान्य छ र स्वास्थ्यकर्मीको सम्पर्कमा रहेको समेत जानकारी दिएका छन् ।
यसअघि नेपालमा कोरोना संक्रमितको संख्या २४६ थियो भने आज राती ३ जना नयाँ कोरोना भेटिएसंगै नेपालमा कोरोना संक्रमितको संख्या २४९ पुगेको छ । साथै नेपालमा कोरोनालाई जितेर अस्पतालवाट डिस्चार्ज भई घर फर्किनेको संख्या ३५ पुगेको छ ।
यो पनि पढ्नुहोस्
नेपालमा संक्रमितको संख्या २४६ पुग्यो, आज फेरि थपिए कोरोनाका नयाँ १ संक्रमित
नेपालमा संक्रमितको संख्या २४५ पुग्यो, आज बिहानै थपिए कोरोनाका नयाँ २ संक्रमित
