नेपालगन्ज, साउन २४ । भेरी अस्पताल नेपालगञ्जमा गरिएको परीक्षणमा आज शनिबार बाँकेमा थप २० जनामा कोरोना भाइरस (कोभिड-१९) संक्रमण पुष्टि भएको छ । बाँकेमा शुक्रबार मात्र ४९ जनामा कोरोना पुष्टि भएको थियो ।
गत २४ घण्टामा ३०० नमुनाको पिसिआर परीक्षण गर्दा आज दिउसो बर्दियाका २ जना र बाँकेका २० जना गरी २२ जनामा कोरोना संक्रमण देखिएको छ । भेरी अस्पताल बाँकेले दिएको जानकारी अनुसार नेपालगन्जमा १६ र कोहलपुरमा ४ जनामा कोरोना संक्रमण देखिएको हो ।
कोरोना संक्रमण बढ्न थालेपछि जिल्ला प्रशासन कार्यालय बाँकेले जिल्लाभरि तेस्रो पटक जारी निषेधाज्ञा गरेको थियो । यसैबीच समुदाय स्तरमा कोरोना संक्रमण बढ्दै गएको भन्दै शनिबारसम्म जारी निषेधाज्ञा ३ दिन थप गरिएको छ ।
शनिबार राति १२ बजेदेखि प्रशासन कार्यालयले मंगलबार राति १२ बजेसम्मका लागि सुरक्षा, एम्बुलेन्स, शव बाहन, दमकल बाहेकका सम्पूर्ण सवारी साधन, पसल व्यवसाय सञ्चालन र हिँडडुल गर्न निषेध गर्ने निर्णय गरेको हो ।
