गलकोट, ९ असार । बागलुङका १० स्थानीय तह आगामी वर्ष कोरोना रोकथाम, नियन्त्रण तथा गुमेको रोजगारी सिर्जना गर्ने कार्यक्रमलाई उच्च प्राथमिकता दिइ नयाँ बजेट तथा कार्यक्रम ल्याउने तयारीमा जुटेका छन् ।
काठेखोला गाउँपालिकाले बजेटमा कोरोना नियन्त्रण तथा रोकथामका लागि रु एक करोड बढीको विनियोजन गर्न लागेको अध्यक्ष अम्मरबहादुर थापाले जानकारी दिनुभयो । “आगमी वर्ष शिक्षा, कृषि तथा स्वास्थ्यलाई प्रमुख प्राथमिकता दिएर बजेट निर्माणमा जुटेका छौँ”, उहाँले भन्नुभयो “ विकास निर्माणको बजेट घटाएर कोरोना नियन्त्रण तथा रोकथामका लागि बजेट ल्याउने तयारीमा छौँ ।”
सो करिब रु ४३ करोडको बजेट ल्याउन लागेको सो गाउँपालिकाले कोरोना मैत्री कार्यक्रम, सरसफाइ, सचेतना लगायतका कार्यक्रम ल्याउने तयारीमा गरेको जनाइएको छ । चालु आवका तालिम, क्षमता विकास लगायतका भीडभाड हुने खालका कार्यक्रम रद्द गरिएका छन् ।
जिल्लामा सबैभन्दा बढी बजेट ल्याउने बागलुङ नगरपालिकाले आगमी आवका लागि झण्डै एक अर्बको बजेटमा रु. १० करोड बजेट कोरोना शीर्षकमा विनियोजन गर्न लागेको छ । कोरोनाका कारण रोजगारी गुमाएकालाई स्वरोजगारी दिन नगरपालिका जमानी बसेर ऋण सहायता गर्ने लगायतका कोरोना मैत्री कार्यक्रम ल्याउने नगर प्रमुख जनकराज पौडेलले जानकारी दिनुभयो ।
“धेरैले रोजगारी गुमाएर स्वदेश फर्कनुभएको छ” उहाँले भन्नुभयो, “गुमेको रोजगारी सिर्जना गर्ने गरी नगरपालिकाले बिना धितो ऋण उपलब्ध गराएर स्वरोजगार गर्ने नीति रहेको छ ।” यस्तै स्वास्थ्य सामग्री खरिद गर्ने, कोरोना उपचार तथा रोकथाममा खट्नेलाई विशेष प्याकेज जस्ता कार्यक्रम सार्वजनिक गर्ने नगरपालिकाको योजना रहेको छ ।
यस्तै जिल्लाको ताराखोला गाउँपालिकाले अन्य क्षेत्रका बजेट कटाइ कोरोनालाई प्राथमिकता दिएर बजेट निर्माणमा जुटेको गाउँपालिकाका अध्यक्ष प्रकाश घर्तीले बताउनुभयोे । कोरोना जोखिम बढ्दै जाँदा स्थानीय तहलाई क्वारेन्टिन तथा आइसोलेशन व्यवस्थापनमा समस्या हुन थालेको छ । अगामी दिनमा समस्या आउन नदिन स्थानीय तहले नयाँ बजेटमा कोरोनालाई बढी प्राथमिकता दिएका हुन् ।
स्थानीय तहमै आइसोलेशन निर्माण , सरसफाइ, कोरोनाबाट बच्ने उपाय लगायतका कार्यक्रम समावेश गरी बजेट ल्याउने तयारीमा जिल्लाका स्थानीय तहहरु जुटेका हुन् ।
