गोरी बन्न किरिम पाउडर, धस्न जानिएन ।
राम्री बन्न कहिल्यै पार्लर, पस्न जानिएन ।।
लगाम लगाएको घोडा जस्तै परियो आफु ।
माया जताउन गफ छाटेर, बस्न जानिएन ।।
बोल्न पनि डर लाग्थ्यो, नजिक परेपछि ।
संस्कार बिर्सी अंगालोमा, कस्न जानिएन ।।
मुखले होइन सधैं मनले माया गरियो ।
माया लाग्छ भन्दै चिप्लो, घस्न जानिएन ।।
देख्नेले त डोरी पनि, सर्प देख्छन् हजुर ।
“काली” नागझै कसैलाई, डस्न जानिएन ।।
यो पनि पढ्नुहोस् :
फर्क फर्क हे परदेशिएका, ति कोमल पाउ
