शोभा काफ्ले खतिवडा 
मनको मायाँले चन्द्रको उज्यालो झैँ सुन्दर आकाश नै बनाउन पो मन छ !
घामको कलाको सारा किरण बटुली मलाई; देशको शोभा बढाउन मन छ !!
एउटा वसन्तमा त्यो बनको गुराँस झै ढकमक्क फूल्न कति मन छ !
देश यो पालुवा र फूल झैँ फुलोस भनेर कामना गर्न अव मन छ !!
कतै बनमा झैँ फूल यो मनमा; फुलाउन पनि मन छ !
ये मेरो देश विकासका रड्गले ढकमक्क पार्न मन छ !!
मनमा यो देश पनि प्रिय तिमी जस्तै हरपल छाइ रहोस् !
यो माटो भरी समृद्दिको कथा हरपल अव लेखियोस !!
तिमी पनि यस्तै सुटुक्क आइ मन झैँ फुल है भन्छ !
हरपल त्यो जून झैँ मनमा लुकामारी खेल है मुटुले भन्छ !!
मनका हर रहरहरुमा तिम्रा सुन्दर मायाँ भर्न मन छ !
मुटु भरी तिम्रा त्यागहरुलाई नै सजाउन कति मन छ !!
तिम्रो त्यो मुटु यो छाती भित्र मलाई लुकाइदिन मन छ !
तिम्रो मायाँ मनको गमलामा फुलाई दिन मन छ !!
तिमी पथमा हिँड्दा पनि बाटो नै बन्न मलाई कति मन छ !
तिम्रा हरेक चाहनाहरुले अव सगरमाथा चुमुन पो भन्छ !!
यस्तो मनको रहर भित्र नै देशको मायाँ फुल्छ !
यो देशलाई समृद्दिले छोओस भनि मन भन्छ !
मनको शोभा शान्त सितल चन्द्र झै बनोस् भन्छ !
घामको ज्योति, पानीको खेती गरोस ये देश भन्छ !!
यसका लागि हिमालको हिउँले सजाउन देशलाई मन छ !
पहाडको पानी हाली अन्न उब्जाउन् मन छ !!
देश टुक्रियाउने जालीहरुको चाहना टुक्र्याउन मन छ !
देश घात गर्ने को हुन पहिचान देशले गरोस मन भन्छ !!
एकजुट बनौ अव हामी नत्र देश यो गुम्ला !
टुक्रिएको यो मुलुकमा हामी कस्ता हौला ?
हिमाल जस्तै मनलाई बनाई पहाड झैँ चट्टान हुन मन छ !
मनको मायाँ तिमीलाई दिन मलाई मन छ !!
*शोभा काफ्ले खतिवडा लेखक, साहित्यकार, सामाजिक अभियन्ता हुनुहुन्छ । उहाँका राष्ट्रिय भावनाले ओतप्रोत भएका उत्कृष्ठ रचनाहरुले सच्चा देशभक्त नेपालीको मन जितेका छन । उहाँले साहित्यको माध्यमवाट देशको राष्ट्रियता, सार्वभौमिकता, भौगोलिक अखण्डता र स्वाभिमानको विषयमा निरन्तर कलम चलाउदै आउनु भएकी राष्ट्रिय कवयत्री हुनुहुन्छ ।
