९ असोज, दमौली । तनहुँको बन्दीपुर गाउँपालिका–४ विमलनगर यतिबेला पर्यटकीय गन्तव्यका रुपमा विकास हुन थालेकोे छ ।
विमलनगरमा रहेको दक्षिण एशियाकै ठूलो मानिएकोे सिद्धगुफा र रक क्लाइम्बिङ पर्यटकका लागि पहिलो रोजाइ बनेकाले यहाँ पर्यटकको सङ्ख्या दिनप्रतिदिन बढ्दै गएको हो । गुफा अवलोकन र गुफाभित्र रहेका वस्तुको खोजबिन गर्नका लागि पनि अहिले पर्यटकको वृद्धि भएको सिद्धगुफा व्यवस्थापन समितिका अध्यक्ष लालकुमार श्रेष्ठले बताउनुभयो ।
यो गुफा पृथ्वीराजमार्गको डुम्रेबाट २ किलोमिटर पूर्व विमलनगर माथि डाँडामा छ । विमलनगरबाट करीब आधा घण्टाको यात्रा गरी पुगिने गुफामा जो कोही पनि मोहित हुन्छन् । विभिन्न जीवजन्तु तथा भगवान्का आकृति र चमेरोका कारण पनि उक्त गुफा आकर्षणको केन्द्रबिन्दु बनेको हो ।
करीब ४०० मिटर लामो यस गुफाभित्र समयअनुसार विभिन्न खेल हुने गरेकाले गुफा अवलोकनका लागि दैनिक २०० भन्दा बढी आन्तरिक तथा बाह्य पर्यटक आउने गरेको अध्यक्ष श्रेष्ठले बताउनुभयो ।
विमलनगरमै साहसिक एवं मनोरञ्जनात्मक रक क्लाइम्बिङका लागिसमेत पर्यटकको आवागमन बढेको छ ।
चट्टान आरोहण र यहाँको प्राकृतिक सुन्दरताले पनि लोभ्याउने रक क्लाइम्बिङ गर्न आउने पर्यटकले बताएका छन् ।
एक सय पचास मिटर लम्बाइ र १५ मिटर चौडाइ रहेको सो पहरा हिमाली क्षेत्रबाहेक राजमार्ग क्षेत्रकै सबैभन्दा उत्कृष्ट र लामो आरोहण मार्ग भएको अध्यक्ष श्रेष्ठले बताउनुभयो । पृथ्वीराजमार्गसँगै जोडिएको उक्त क्षेत्रमा आउने पर्यटकले मस्र्याङ्दी नदीमा ¥याफ्टिङ गर्नाका साथै सिद्धगुफा अवलोकन पनि गर्न सक्ने भएकाले रक क्लाइम्बिङ गर्ने पर्यटक बढेको उहाँले बताउनुभयो ।
हाल चुनपहरामा दुई मिटरको फरकमा ११ क्लाइम्बिङ रुट खोलिएका र एकैपटक २२ ले जनाले क्लाइम्बिङ गर्न मिल्छ ।(रासस)
