एजेन्सी, १३ वैसाख । म्यानचेस्टर डर्बीमा बुधबार म्यानचेस्टर युनाइटेडमाथि सहज जित हात पारेसँगै म्यानचेस्टर सिटीका लोरी सानेले यस नतिजाले इङ्लिस प्रिमियर लिगको उपाधि रक्षा गर्ने लक्ष्यका लागि मनोबल बढेको प्रतिक्रिया दिएका छन् ।
सिटीले युनाइटेडको घरेलु मैदान ओल्ड ट्राफोर्डमा भएको खेलमा २–० को जित हात पारेको हो । प्रिमियर लिगको पछिल्लो ११ खेलमा हात पारेको लगातारको सुखद नतिजापछि सिटी शीर्ष स्थानमा फर्किएको हो । प्रिमियर लिगमा सिटी र लिभरपुलले समान ३ खेल खेल्न बाँकी छ ।
सिटी ३५ खेलमा ८९ अंकका साथ शीर्ष स्थानमा फर्किएको हो । जो समान खेल खेलेको लिभरपुलभन्दा मात्र १ अंक बढी हो। टोटेनह्याम ७० अंकका साथ तेस्रो, चेल्सी ६७ अंकका साथ चौथो र ६६ अंक जोडेको आर्सनल पाँचौं स्थानमा छन्। युनाइटेड भने ६४ अंकका साथ छैटौं स्थानमा छ।
