विराटनगर, ३१ असार । प्रदेश नं.१ सरकारले दक्षिण एशियाली खेलकुदमा यस प्रदेशका विजेता खेलाडीहरुलाई आज सम्मान तथा नगद पुरस्कार प्रदान गरेको छ । तेह्रौँ दक्षिण एशियाली खेलकुदमा यस प्रदेशबाट पदक विजेता ९८ जना खेलाडीलाई प्रदेश सरकारले सो सम्मान तथा पुरस्कार प्रदान गरेको हो ।
सम्मान तथा पुरस्कार प्राप्त गर्नेमा एकलतर्फ स्वर्ण पदक पाउने छ जनालाई जनही रु तीन लाख, रजत पदक पाउने चार जनालाई जनही रु दुई लाख र कास्य पदक पाउने १० जनालाई जनही रु एक लाख रहेका छन् । यसैगरी टीमतर्फ स्वर्ण पदक पाउने १५ जना, रजत पदक पाउने २२ जना र कास्य पदक पाउने ४१ जना रहेका छन् ।
स्वर्ण पदक प्राप्त गर्ने झापाका जुडो खेलाडी देविका खड्का, सुनसरीका तेक्वाण्डो खेलाडी सिना लिम्बु मादेन, मोरङका तेक्वाण्डो खेलाडी भुपेन श्रेष्ठ, उदयपुरका कराते खेलाडी अनुपमा मगर, इलामका उसु खेलाडी जुनी राई र सोलुखुम्बुका साइक्लिङ खेलाडी रावेश मगर छन् ।
रु तीन लाखलाई आधारमानी खेलाडी सङ्ख्याको आधारमा टीममा स्वर्णपदक पाउने खेलाडीलाई बढीमा रु एक लाख र कम्तीमा रु ७५ हजार ५००, रु दुई लाखलाई आधारमानी खेलाडी सङ्ख्याको आधारमा टीममा रजत पदक पाउने खेलाडीलाई बढीमा रु एक लाख र कम्तीमा रु ६० हजार तथा रु एक लाखलाई आधारमानी खेलाडी सङ्ख्याको आधारमा टीममा कास्य पदक पाउने खेलाडीलाई बढीमा रु ५० हजार र कम्तीमा रु ४१ हजार नगद पुरस्कार प्रदान गरिएको सामाजिक विकास मन्त्रालयका सचिव गोविन्द कार्कीले जानकारी दिनुभयो । उहाँले विजेता ९८ जना खेलाडीमध्ये १० जना खेलाडी दोहिरिएका छन् भन्नुभयो । पुरस्कारमा कूल रु ८० लाख वितरण भएको बताइएको छ ।
मुख्यमन्त्री शेरधन राईले देशको प्रतिष्ठा बढाउने खेल र खेलाडीलाई सरकारले उच्च प्राथमिकतामा राखेको बताउनुभयो । उहाँले कोभिड–१९ को महामारीको समयमा खेलाडीले निश्चित अनुशासन एवं भौतिक दूरी कायम राख्नु सुझाव दिँदै खेलकुदको माध्यमबाट देशको प्रतिष्ठा बढ्ने विश्वास व्यक्त गर्नुभयो । उहाँले खेलकुदको माध्यमबाट व्यावसायिक बन्न खेलाडीहरुलाई सुझाव दिँदै स्वच्छ, सुखी र समुन्नत प्रदेश बनाउन सरकारले काबुमा रहेका बजेटलाई सोही अनुसार खर्च गर्ने प्रतिबद्धता व्यक्त गर्नुभयो ।
सामाजिक विकासमन्त्री जीवन घिमिरेले प्रदेश सरकारले खेलकुद क्षेत्रलाई उच्च प्राथमिकतामा राखेको र सोही अनुसार खेलकुद ऐन बनाएको चर्चा गर्दै प्रदेशको १३७ वटै स्थानीय तहमा खेलमैदान बनाउने बताउनुभयो । उहाँले प्रत्येक जिल्लामा प्रदेशस्तरीय रङ्गशाला निर्माण गर्ने भन्दै मोरङको बैजनाथपुरमा रहेको खेल मैदानलाई अन्तरराष्ट्रियस्तरको रङ्गशाला बनाउने तयारीमा सरकार रहेको जानकारी दिनुभयो ।
पुरस्कृत खेलाडीहरुका तर्फबाट फुटबल खेलाडी सुजन श्रेष्ठ र टेक्वान्डो खेलाडी सीमा लिम्बुले खेललाई सर्वोपरी बनाउन सरकारले विशेष ध्यान दिनुपर्ने बताउँदै खेलले राष्ट्रको गौरव र पहिचान बढाउने भएकाले यसको चौतर्फी विकासमा ध्यान दिन सरकारसँग आग्रह गर्नुभयो ।
