दमौली, १० वैशाख । बन्दाबन्दीका कारण मस्जिद बन्द गरिएपछि तनहुँ जिल्लाका मुस्लिमहरुले घरमै नमाज पढ्न थालेका छन् । कोभिड–१९ को जोखिम न्यूनीकरणका लागि बन्दाबन्दी गरिएपछि यहाँका मुस्लिम समुदायले घरमै नमाज पढ्न थालेका हुन् ।
व्यास नगरपालिका–४ स्थित दमौली मुस्लिम अन्जुमन कमिटीका सचिव मन्सुर अहमदले बन्दाबन्दी भएसँगै मुस्लिम समुदायले घरघरमै नमाज पढ्न थालेको जानकारी दिनुभयो । “सरकारले बन्दाबन्दी लागू गरेसँगै यहाँ रहेको नुरी हन्फी जामे मस्जिद बन्द छ, मुस्लिम समुदायलाई घरमै बसेर नमाज पढ्न भनेका छौँ”, उहाँले भन्नुभयो, “मस्जिदको मूल ढोकामा नै चाबी लगाइएको छ ।”
गत चैत ११ गतेदेखि बन्दाबन्दी भएपछि व्यास नगरपालिकाले पनि मस्जिद, मन्दिर, चर्चलगायत भीडभाड हुने स्थानहरू पूर्णरूपमा बन्द गर्न निर्देशन दिएको थियो । सोहीबमोजिम सबैलाई सूचना जारी गरेर मस्जिद बन्द हुने बारे जानकारी गराइएको थियो ।
मस्जिदमा दैनिक पाँच पटक नमाज पढ्ने गरिन्थ्यो । अन्य दिनमा दैनिक २०÷२५ जनाले मात्रै मस्जिदमा गएर नमाज पढ्ने गर्दथे भने हरेक शुक्रबार ७०० भन्दा बढीले मस्जिदमा नमाज पढ्ने गर्दथे ।
तनहुँको व्यास नगरपालिकाको दमौली, श्याम्घा, भानु नगरपालिकाको सतिस्वाँरा, शुक्लागण्डकी नगरपालिकाको बेलचौतारालगायतका ठाउँमा मुस्लिम समुदायको बसोबास रहेको मुस्लिम अगुवा एवं सञ्चारकर्मी शेष मोहम्मद हनिफ (गोरा मियाँ) ले जानकारी दिनुभयो ।
सांसद्द्वारा सामग्री वितरण
तनहुँ क्षेत्र नं २ का प्रतिनिधिसभा सदस्य केदार सिग्देलले जिल्लाका दुई नगरपालिकालाई मङ्गलबार स्वास्थ्य सामग्री सहयोग गर्नुभएको छ । कोभिड–१९ को जोखिम न्यूनीकरणका लागि सांसद सिग्देलले व्यास नगरपालिका र शुक्लागण्डकी नगरपालिकालाई व्यक्तिगत सुरक्षा कवच (पिपिइ), थर्मल गन, मास्कलगायतका सामग्री सहयोग गर्नुभएको हो ।
उहाँले व्यास नगरपालिकाकालाई दुई थान पिपिइ, एक थान थर्मल गन, १० थान एन९५ मास्क र २०० थान सर्जिकल मास्क सहयोग गर्नुभएको छ भने शुक्लागण्डकी नगरपालिकाकालाई दुई थान पिपिइ, एक थान थर्मल गन, १० थान एन९५ मास्क र २०० थान सर्जिकल मास्क सहयोग गर्नुभयो ।
