काठमाडौं । वागमती प्रदेश सरकारका चार मन्त्रीले राजिनामा दिएका छन् । आज शुक्रबार नेपाली कांग्रेसबाट बनेका चार मन्त्रीले सामूहिक राजीनामा दिएका हुन् ।
बागमती प्रदेशमा कांग्रेसको संसदीय दलको नेता परिवर्तन गर्ने तयारी गरिएको छ । संसदीय दलका नेता रहेका बहादुर सिंह लामालाई हटाउनका लागि दबाब दिने उद्देश्यले चारमन्त्री शुक्रबार राजीनामा दिएका हुन् ।
बागमती प्रदेशका पार्टी सभापति समेत रहेका इन्द्र बानियाँले संसदीय दलको नेताप्रति सांसदहरुले असन्तुष्ट रहेको जानकारी गराए । मुख्यमन्त्री लामा बानियाँलाई हराएर संसदीय दलको नेता बनेका थिए ।
राजीनामा दिनेमा संस्कृति तथा पर्यटनमन्त्री विमल ठकुरी, सहकारी तथा गरिबी निवारण मन्त्री मदुकुमार श्रेष्ठ, युवा तथा खेलकुद मन्त्री मीनकृष्ण महर्जन र आन्तरिक मामिला तथा कानुन मन्त्री सुरजचन्द्र लामिछाने रहेका छन् ।
मुख्यमन्त्रीसँग बजेट वितरणसहितका विषयमा असन्तुष्ट भएर राजीनामा दिएका मन्त्रीहरु अहिले संसदीय दलको बैठकमा छन् । मुख्यमन्त्री लामालाई कांग्रेस संसदीय दलको नेताबाट हटाउने उनीहरुको गृहकार्य रहेको हो ।
