काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो पार्टीको रहर गणतन्त्रवादी दलहरुको कित्तामा उभिएर फोटो खिचाउने नभएको बताएका छन् ।
सो पार्टीको केन्द्रीय समितिको बैठक अघि केन्द्रीय कार्यालय वनस्थलीमा बोल्ने क्रममा सभापति लामिछानेले गणतन्त्रवादी भन्ने दलहरूले गणतन्त्रको खोल मात्रै ओढेको आरोप लगाए ।
गणतन्त्रवादी दलहरूसँग फोटो खिचाउने पक्षमा आफ्नो दल नरहेको स्पष्ट पारेका हुन् । वर्तमान सरकारप्रति आक्रोशित देखिएका लामिछानेले नेपाली कांग्रेस र नेकपा एमालेप्रति लक्षित गर्दै दुईटा चोर मिलेर साधु नहुने व्यंग गरे ।
रास्वपा राजसंस्था कि गणतन्त्रको पक्षमा उभिन्छ भन्ने प्रश्नलाई लामिछानेले सांकेतिक जवाफ दिएका हुन् । लामिछानेले दुई तिहाइको सरकारले ज्यूँदै छोड्नु नै आफ्नो जित भएको उनले बताए ।
उनले करिब ५ महिना अगाडि सरकारले जबरजस्ती झुटा मुद्दा लगाएर आफूलाई पार्टी कार्यालयबाटै उठाएर लगेको स्मरण गरे । उनले आफू न्यायको जुनसुकै तराजुमा तौलिन पनि तयार भएर बसेको बताए । उनले आफूलाई फसाउन सरकारले सबै शक्ति खर्चिएको समेत जिकिर गरे ।
