भक्तपुर । कांग्रेस सभापति एवं पूर्वप्रधानमन्त्री शेरबहादुर देउवाले प्रधानमन्त्री केपी शर्मा ओली नेतृत्वको सरकारले एक सय दिनमा राम्रो काम गरेको बताएका छन् ।
कांग्रेस जिल्ला कार्यसमिति भक्तपुरले शनिबार आयोजना गरेको शुभकामना आदानप्रदान तथा जय नेपाल भक्तपुर स्मारिका लोकार्पणका अवसरमा सभापति देउवाले सरकारलाई पार्टीका तर्फबाट कुनै किसिमको अवरोध नहुने समेत बताए ।
‘केपी शर्मा ओलीको नेतृत्वको संयुक्त सरकारले राम्रो काम गरिरहेको छ, हामी सरकारमा भएका कारण मात्रै भनेको होइन, प्रधानमन्त्री ओलीले साँच्चै राम्रो काम गर्नुभएको छ,’ उनले भने, ‘मलाई विश्वास छ, आगामी दिनमा पनि यस्तै राम्रा काम गर्दै जानु हुनेछ ।’
प्रधानमन्त्री ओलीलाई आफूले पनि सल्लाह, सुझाव दिएर सहयोग गरिरहेको बताउदै उनले विश्वमा जुनसुकै देशमा पनि सरकारको आलोचना हुने हुँदा यहाँ पनि विपक्षी पार्टीहरूले सरकारको आलोचना गर्नु स्वाभाविक भएको बताए ।
आलोचनालाई खराब नमानेको र त्यसलाई तथ्यपरक ढङ्गले सरकारले ध्यान दिने सभापति देउवाको भनाइ थियो । सरकारलाई आइपर्ने समस्या समाधानका लागि आफ्नातर्फबाट पूरापूर सहयोग रहने पनि उनले उल्लेख गरे ।
‘विपक्षीबाट आएका आलोचनालाई पनि गम्भीरताका साथ लिएर अहिलेको सरकारले परिणाममुखी काम गरेर देखाउनुपर्नेछ,’ उनले भने, ‘संयुक्त सरकार बनेपछि पार्टी पंक्ति पनि खुसी रहेको छ ।’
वर्तमान सरकारलाई सफल बनाउन कांग्रेस लाग्ने र सहमतिअनुसार नै सरकार सञ्चालन हुने पनि उनले उल्लेख गरे ।
