काठमाडौं । पूर्वउपप्रधान एवं गृहमन्त्री समेत रहेका राष्ट्रिय स्वतन्त्र पार्टी (रास्वपा)का सभापति रवि लामिछाने पक्राउ परेका छन् । नेपाल प्रहरीको केन्द्रीय अनुसन्धान ब्युरो(सीआईबी) को टोलीले आज पूर्वगृहमन्त्री लामिछानेलाई रास्वपा पार्टी कार्यालयबाट आज पक्राउ गरेको हो ।
सूर्यदर्शन सहकारीको रकम अपचलनमा संलग्न आरोपमा अनुसन्धान गर्न कास्की जिल्ला अदालतले प्रहरीलाई पक्राउ गर्न अनुमति दिएर पक्राउ पूर्जी जारी भएलगत्तै सीआईबीका एसपी होबिन्द्र बोगटीसहितको सीआईबी टोली रास्वपा कार्यालय पुगेको थियो ।
जिल्ला प्रहरी कार्यालय कास्कीले रास्वपाका सभापति लामिछानेलाई पक्राउ गरी पठाइिदन पत्र पठाएपछि प्रहरीले उनलाई पक्राउ गरेको हो । नेपाल प्रहरीको केन्द्रीय अनुसन्धान ब्युरो, काठमाडौं उपत्यका अपराध अनुसन्धान कार्यालय र जिल्ला प्रहरी कार्यालयलाई सम्बोधन गर्दै ‘मानिस पक्राउ गरी पठाइदिने सम्बन्ध’ ब्योहोराको पत्र कास्की प्रहरीले पठाएको थियो ।
जिल्ला अदालत कास्कीले पूर्वगृहमन्त्री लामिछानेविरुद्ध आजै पक्राउ पूर्जी जारी गरेपछि प्रहरीले उनलाई आज पक्राउ गरेर आजै स्थलमार्गबाट कास्की लैजाने तयारी गरेको छ । सहकारीको रकम अपचलन मुद्धा मुछिएका लामिछानेलाई अनुसन्धानका लागि प्रहरीले नियन्त्रणमा लिएको हो ।
सहकारीको रकम गोरखा मिडिया नेटवर्कमा आएपछि खर्च गर्ने भूमिकामा जिम्मेवार रहेको सहकारी ठगी छानबिन समितिले निष्कर्ष निकालेको थियो । सोही प्रतिवेदन कार्यान्वयनका क्रममा गोरखा मिडिया नेटवर्कका उनका तत्कालीन साझेदार छविलाल जोशी पक्राउ परिसकेका थिए ।
यस्तै लामिछानेविरुद्ध प्रहरीले सूर्यदर्शन सहकारीको संस्थापक अध्यक्ष गितेन्द्रबावु (जीबी) राईसँग मिलेर लामिछानेले गोर्खा मिडिया नेटवर्कमा रकम ल्याएर अपचलन गरेको आरोपमा जिल्ला प्रहरी कार्यालय कास्कीले छुट्टै अनुसन्धान समेत गरिरहेको थियो ।
यो पनि पढ्नुहोस्
पूर्वगृहमन्त्री लामिछानेलाई पक्राउ गरी पठाइदिन कास्की प्रहरीको पत्राचार
रवि लामिछानेसहित १४ जनाविरुद्ध एकैपटक पक्राउ पुर्जी
रविलाई पक्राउ गर्न रास्वपा कार्यालय पुग्यो सीआईबीको टोली
