काठमाडौँ । प्रमुख प्रतिपक्षी दल नेकपा (एमाले) का सांसद कृष्णगोपाल श्रेष्ठले बालकुमारी घटनापछि प्रधानमन्त्री र गृहमन्त्रीले नैतिकताका आधारमा राजीनामा दिनुपर्ने बताएका छन् ।
प्रतिनिधिसभाअन्तर्गतको राज्यव्यवस्था तथा सुशासन समितिको सोमबारको बैठकमा श्रेष्ठले बालकुमारीमा भएको सम्पूर्ण घटनाको जिम्मेवारी सरकारले लिनुपर्ने बताएका हुन् ।
सांसद श्रेष्ठले पुस १३ गत दुई जना युवाको हेर्दाहेर्दै जीवन गएको भन्दै त्यो सरकारबाट भएको हत्या भएकाले सम्पूर्ण जिम्मेवारी सरकारले लिनुपर्ने बताएका हुन् । राजीनामा दिए अर्को सरकार बनाउन मार्गप्रशस्त गर्न उनले प्रधानमन्त्रीलाई आग्रह गरे ।
उनले वर्तमान सरकार ‘निकम्मा, नालायक, असक्षम’ भएको टिप्पणी गरे । बालकुमारी घटना सरकारबाट गरिएको हत्या भएको उनले बताए । वर्तमान सरकारपछिको एक वर्ष मुलुक बर्बाद भएको उनको भनाइ छ ।
