काठमाडौं । सर्वोच्च अदालतको न्यायाधीशमा नियुक्तिका लागि सिफारिस भएका सवै ६ जनाकै नाम संसदीय सुनुवाइ समितिले आज अनुमोदन गरेको छ । आज बिहान बसेको संसदीय समितिको बैठकले सवै ६ जना प्रस्तावित न्यायाधीशको नाम अनुमोदन गरेको हो ।
गत मंसिर ५ गते न्याय परिषद्ले उनीहरूलाई सर्वोच्चमा नियुक्तिको सिफारिस गरेको थियो । संसदीय सुनुवाइबाट अनुमोदन हुने ६ न्यायाधीशहरुमा सुनीलकुमार पोखरेल, बालकृष्ण ढकाल, महेश शर्मा पौडेल, टेकप्रसाद ढुंगाना, सारंगा सुवेदी र अब्दुल अजीज मुसलमान रहेका छन् ।
गत मंसिर २९ गतेदेखि संसदीय सुनुवाइ समितिले प्रस्तावित न्यायाधीशहरूको सुनुवाइ सुरु गरेर सोमबार सुनुवाइ सकाएको थियो । सुनुवाइ सकिएकाले आज नाम अनुमोदन गरिएको हो ।
सुनुवाई समितिबाट नाम अनुमोदन भएसंगै उनीहरू नियुक्तिका निम्ति योग्य ठहरिएका छन् । समितिले उनीहरूको नाम अनुमोदन गर्ने निर्णय गरेपछि अव राष्ट्रपति रामचन्द्र पौडेलबाट शपथ ग्रहण गरी सर्वोच्च अदालतको न्यायाधीशका रूपमा कामकाज सुरु गर्ने छन् ।
