काठमाडौँ । नेकपा (एकीकृत समाजवादी) मा लागेका तत्कालिन नेकपाका नेताहरुले उक्त पार्टी छोड्ने क्रम बढेको छ । नेकपा एसका अध्यक्ष माधव नेपालले नेकपा (माओवादी केन्द्र) संग पार्टी एकता गर्ने भनेपछि पार्टी परित्याग गरेर एमालेमा फर्किनेको संख्यामा तीव्रता आएको हो ।
यसैक्रममा नेकपा एसका केन्द्रीय सदस्य डा. बालकृष्ण चापागाईं पनि एमालेमै फर्किएका हुन् । एमाले विभाजन हुँदा नेता नेपालले गठन गरेको समाजवादीमा लागेका चापागाईं अर्थ तथा योजना विभागका उपप्रमुख एवं रुपन्देही इन्चार्ज थिए ।
एमाले उपाध्यक्ष विष्णु पौडेलले आफ्नो सामाजिक संजाल ट्वीटरमार्फत चापागाईं एमालेमा फर्किएको जानकारी दिएका हुन् । आज आइतबार बिहान चापागाईलाई एमाले अध्यक्ष केपी शर्मा ओलीले टीका र खादा लगाएर स्वागत गरेका हुन् ।
राष्ट्रिय समाचार समिति (रासस) का पूर्व महाप्रबन्धक तथा प्रेस चौतारी नेपालका पूर्वअध्यक्षसमेत रहेका चापागाईंले आफू पुरानै घर एमालेमा फर्किएर राजनीति गर्ने जानकारी दिए ।
