काठमाडौं । संघीय संसदअन्तर्गतको प्रतिनिधिसभाको उपसभामुख पदमा प्रमुख प्रतिपक्षी दल नेकपा (एमाले) को तर्फबाट सांसद विद्या भट्टराईले आज उम्मेदवारी दर्ता गराएकी छन् । एमालेकी सांसद भट्टराईले नयाँ वानेश्वरस्थित संघीय संसदको भवनमा पुगेर उपसभामुख पदमा मनोनयन दर्ता गराएकी हुन् ।
उनको प्रस्तावकमा एमालेको संसदीय दलकी सचेतक शान्ता चौधरी र समर्थकमा एमालेकै सांसद कृष्णभक्त पोखरेल रहेका छन् । यसैगरी सत्ता गठबन्धनको तर्फबाट साझा उम्मेद्वारको रुपमा नेपाली कांग्रेसकी पुष्पा भुसालले उम्मेदवारी दर्ता गराएकी छन् ।
प्रतिनिधिसभा सदस्य भट्टराई तत्कालीन पर्यटनमन्त्री स्वर्गीय रवीन्द्र अधिकारीकी पत्नी हुन् । ताप्लेजुङ हेलिकप्टर दुर्घटनामा तत्कालीन पर्यटनमन्त्री अधिकारीको निधन भएपछि रिक्त सिटमा भएको उपनिर्वाचनमा कांग्रेसका नेता खेमराज पौडेललाई भारी मत अन्तरले पराजित गर्दै उनी विजयी भएकी थिइन् ।
प्रतिनिधिसभाका सभामुख अग्निप्रसाद सापकोटाले प्रतिनिधिसभाको उपसभामुख पदको निर्वाचन भोलि असार ३१ गते शुक्रबार अपराह्न ३ बजेका लागि तोकेका छन् ।
आज असार ३० गते बिहीबार बिहान ११ देखि १ बजेसम्म प्रतिनिधिसभाको कुनै सदस्यलाई उपसभामुख पदमा निर्वाचित गरियोस् भनी प्रस्तावको सूचना दर्ता गर्ने कार्यक्रम रहेको सङ्घीय संसद् सचिवालयले जनाएको छ ।
भोलि असार ३१ गते शुक्रबार अपराह्न ३ बजे बस्ने प्रतिनिधिसभाको बैठकमा उपसभामुख पदमा निर्वाचित गरियोस् भनी प्रस्तावकले प्रस्ताव गर्ने र समर्थकले समर्थन गर्ने, उम्मेदवारीको सूचनामाथि सामूहिक छलफल हुने र दर्ता क्रमअनुसार निर्णायर्थ प्रस्तुत गर्ने कार्यक्रम छ ।
