काठमाडौँ । नेकपा एमालेका उपाध्यक्ष भीम रावलले १०औँ महाधिवेशनको दोस्रो दिनको बन्दसत्र राती ७ बजे गर्ने सूचना जारी गर्नु अलोकतान्त्रिक कार्य मात्र नभएर धाँधलीको संकेत पनि भएको बताएका छन् ।
सामाजिक संजाल ट्वीटरमा लेख्दै रावलले दिनभरी बैठक नगरेर प्रतिनिधिहरूलाई अलपत्र बनाउने र संस्थागत छलफल नगरी राती ७ बजे बैठक गर्ने सूचना जारी गरेकोमा आपत्ति प्रकट गरेका छन् । उनले यस्तो कार्यले जनताको बहुदलीय जनवाद अन्तर्गत प्रतिस्पर्धाको राजनीतिमाथि आघात पुग्ने बताएका छन् ।
उनले ट्वीटरमा लेखेका छन्, ‘दिनभरी बैठक नगरेर प्रतिनिधिहरूलाई अलपत्र बनाउने र संस्थागत छलफल नगरी राती ७ बजे बैठक हुने सूचना जारी गर्नु अलोकतान्त्रिक कार्य मात्र होइन धाँधलीको संकेत पनि हो । यसले जनताको बहुदलीय जनवाद अन्तर्गत प्रतिस्पर्धाको राजनीतिमाथि आघात पुग्छ ।’
बिहान १० बजे हुने भनिएको नेकपा (एमाले)को दशौँ राष्ट्रिय महाधिवेशनको बन्दसत्र आज साँझ ७ बजेदेखि शुरु हुने भएको छ । चितवनको सौराहामा जारी महाधिवेशनको बन्दसत्र ७ बजेदेखि शुरु हुन लागेको हो ।
