देउवा सरकारको मन्त्रिमण्डलले भोलि शुक्रबार पूर्णता पाउने Nepalpatra देउवा सरकारको मन्त्रिमण्डलले भोलि शुक्रबार पूर्णता पाउने
२१ आश्विन २०७९, शुक्रबार

देउवा सरकारको मन्त्रिमण्डलले भोलि शुक्रबार पूर्णता पाउने


सत्ता गठबन्धनको बैठक फाइल फोटो

काठमाडौँ । शेरबहादुर देउवा नेतृत्वको सरकारको मन्त्रिमण्डलले भोलि शुक्रबार मात्रै पूर्णता पाउने भएको छ । आजै मन्त्रिपरिषदलाई पूर्णता दिन प्रधानमन्त्रीको सरकारी निवास बालुवाटारमा आज बसेको सत्तारुढ गठबन्धनका शीर्ष नेताको बैठकले दलहरूको आन्तरिक तयारी नपुगेको भन्दै आज बिहीबार मन्त्रिपरिषद् विस्तार नहुने भएको हो ।

यसरी सत्तारुढ गठबन्धनका दलहरूको आन्तरिक तयारी नपुगेकोले भोलि शुक्रबार मात्रै मन्त्रिमण्डललाई पूर्णता दिने गठबन्धनमा सहमति भएको हो । सत्ता गठबन्धनमा नेपाली काँग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी र राष्ट्रिय जनमोर्चा रहेका छन् ।

सत्ता गठबन्धनमा रहेका राजनीतिक दलहरुबीच मन्त्रालयको मोटामोटी भागबण्डा मिले पनि केही विषयमा अझै कुरा मिलाउन बाँकी रहेकाले बिहीबार गठबन्धनको निर्णायक बैठक बसेको थियो ।

यसअघि गठबन्धनमा रहेका दलहरु नेपाली कांग्रेसले ८, नेकपा माओवादी केन्द्रले ५, एकीकृत समाजवादी र जनता समाजवादी पार्टीले ४–४ मन्त्रालय लिने सहमति भएको थियो ।

बैठकमा केहीबेर बसेर नेकपा एकीकृत समाजवादीका अध्यक्ष माधवकुमार नेपाल पार्टी बैठकमा सहभागी हुन निस्केका छन् । नेता नेपाल नेतृत्वको नेकपा एकीकृत समाजवादी पार्टीको स्थायी कमिटी बैठक जारी रहेको छ ।

नेकपा (एकीकृत समाजवादी) लाई कम मन्त्रालय दिएको भन्दै पार्टीभित्र चरम असन्तुष्टि चुलिएको छ । प्रधानमन्त्री शेरबहादुर देउवा तातेर मन्त्रिपरिषद विस्तारको तयारी गरिरहँदा देउवालाई प्रधानमन्त्री बनाउन महत्वपूर्ण भूमिका निर्वाह गरेको वर्तमान सत्ता गठबन्धनकै दल एकीकृत समाजवादी पार्टीभित्र आफ्ना भागमा कम मन्त्रालय परेपछि असन्तुष्टि चुलिएको हो ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !