काठमाडौँ । यमपञ्चक अर्थात् तिहारको दोेस्रो दिन आज साँझ ऐश्वर्य, धनधान्य र सम्पन्नताकी देवी लक्ष्मीको पूजाआराधना गरी श्रद्धा भक्तिपूर्वक लक्ष्मीपूजा गरिएको छ ।
दीपावली गरिसकेपछि पूजा कोठामा दियो, कलश र गणेशसहित लक्ष्मी स्थापना गरेर गरगहना, पैसा, धान, चामल, फलफूल, सेलरोटी र फूलमाला चढाई विधिपूर्वक लक्ष्मीको पूजा गरिएको हो ।
आज दीपावलीको साँझ काठमाडौँ उपत्यका लगायत देशभरका शहरहरु चम्केका छन् । घर-घरमा झिलिमिली बत्ती बालेर दीपावली भएकोले काठमाडौँ झलमल भएको हो ।
आज साँझ पनि दीपावलीका क्रममा काठमाडौँ उपत्यका पूर्णेको तारामण्डल जस्तै देखिएको छ । काठमाडौँ उपत्यका बिजुली बत्तीले झलमल भएको हो ।
