१९ चैत, धनुषा । सर्लाहीको बागमतीमा भएको राजर्षी जनक कप फुटबलको उपाधि सुदूरपश्चिम ११ लाई दिइएको छ ।
शनिबार खेलको २२ औं मिनेटसम्म २–१ ले पछि परेपछि आर्मीका खेलाडीले सुदूरपश्चिमका खेलाडीलाई कुटेपछि खेल स्थगित भएको थियो । शनिबार तनाव भए पनि आइतबार २४ औं मिनेटदेखि खेल फेरि सुरु गर्ने आयोजक वाग्मती युवा क्लबले जनाएको थियो । तर आइतबार आर्मीका खेलाडी प्रतियोगिता बहिष्कार गर्दै मैदानमै नगएपछि आयोजकले सुदूरपश्चिमलाई उपाधि दिएको हो ।
प्रतियोगिता बहिष्कार गरेको आर्मीले दोस्रो भएको पुरस्कार पनि पाएन भने ३० हजार रुपैयाँ जरिवाना पनि तिर्नुपर्ने भएको छ ।
आयोजकले अनुशासन उल्लंघन गरेको भन्दै आर्मीलाई ३० हजार जरिवाना तिराउने र आउँदा प्रतियोगितामा आर्मीलाई समावेश नगर्ने निर्णय पनि गरेको छ ।
उपाधिसँगै सुदूरपश्चिम ११ ले ५ लाख रुपैयाँ पुरस्कार पाएको छ ।
