१६ चैत, उदयपुर। उदयपुरको कटारीमा जारी चौथौ कटारी मेयर गोल्डकपमा गोर्खा ब्वाइज रुपन्देहीलाई ३–० को गोल गर्दै संकटा क्लब काठमाडौं फाइनलमा प्रवेश गरेको छ ।
बिहिबारको दोस्रो सेमीफाइनलमा संकटाका लागि २९ औं मिनेटमा फ्रि किकको सदुपयोग गर्दै प्रकाश बुढाथोकीले गोलको खाता खोलेका थिए । पहिलो हाफ १–० ले अग्रता लिएको संकटाका लागि ८७ औं मिनेटमा १२ नम्बर जर्सीका नाइजेरियन खेलाडी इब्राहिम कोउडियाले आकर्षक गोल गर्दै गोल अन्तर २–० मा पुर्याए ।
त्यसैगरी ९० औं मिनेटमा संकटाका १६ नम्बर जर्सीका सन्त गुरुङ्गले तेस्रो गोल गरे । रुपन्देहीले पहिलो हाफमा पटक–पटक गोल गर्ने अवसर पाए पनि अवसरको सदुपयोग गर्न सकेन ।
रुपन्देहीका १५ नम्बर जर्सीका दिपक राईले दोस्रो हाफमा गरेको आकर्षक प्रहार बारमा लागेर फर्किएको थियो । खेलको म्यान अफ द म्याच संकटाका १२ नम्बर जर्सीका इब्राहिम कोउडिया घोषित भए । उनलाई इलाका प्रहरी कार्यालय कटारीका प्रमुख डिएसपी मेघराज अधिकारीले नगद ५ हजार रुपैयाँका साथमा प्रमाण–पत्र र मेडल प्रदान गरे ।
उपाधिका लागि शनिबार संकटाले झापा ११ सँग प्रतिष्पर्धा गर्नेछ । गएको शनिबारदेखि जारी गोल्डकपमा ३ डिभिजन लिग खेलेका टिमसहित ८ टिमको सहभागिता थियो ।
गोल्डकप बिजेताले नगद ५ लाख रुपैयाँका साथमा ट्रफी हात पार्नेछ भने उप–बिजेताले नगद २ लाख ५१ हजार हात पार्ने मूल आयोजक समितिका अध्यक्ष विनोद कटुवालले बताए । कटारी नगरपालिकाको सहकार्य र साथि समूहको संयोजनमा गोल्डकप आयोजना गरिएको हो ।
