मनाङ । मनाङको ङिस्याङ गाउँपालिकाको नवौँ गाउँसभा बिहीबारदेखि भर्चुअल माध्यमबाट शुरु भएको छ । गाउँसभामा गाउँपालिका अध्यक्ष कान्छा घलेले आगामी २०७८÷७९ का लागि नीति तथा कार्यक्रम प्रस्तुत गर्नुभएको छ ।
उहाँले बाढीपहिरोको जोखिम र कोभिड–१९ को सङ्क्रमणको चपेटामा परेकाले आगामी वर्ष यसलाई मुख्य प्राथमिकतामा राखिने बताउनुभयो । “बाढीपहिरोले भौतिक पूर्वाधारहरूमा क्षति पु¥याएको छ, यसको समाधानका लागि बढी प्राथमिकता दिनेछौंँ”, घलेले भन्नुभयो ।
बाढीपहिरोले एक गाउँ वा बस्तीबाट अर्को स्थानमा पुग्न सक्ने अवस्था नरहेकाले भर्चुअल माध्यमबाट गाउँसभा गर्न लागिएको गाउँपालिकाका प्रमुख प्रशासकीय अधिकृत दीपक ढकालले जानकारी दिनुभयो । एकै स्थानमा जमघट हुने अवस्था नहुँदा वडा–वडा तथा सहज हुने स्थानबाट नै वडाध्यक्ष तथा वडासदस्यहरु, कार्यपालिका सदस्यहरुबीच भर्चुअल माध्यमबाट नीति तथा कार्यक्रम पारित गरी सार्वजनिक गरिने भएको छ ।
ढकालका अनुसार आगामी वर्ष परिणाममुखी भन्दा पनि विपद्को व्यवस्थापनलाई जोड दिइनेछ । नीति तथा कार्यक्रममा विपद्बाट क्षति भएका भौतिक पूर्वाधार र कोभिड–१९ रोकथाम तथा नियन्त्रणलाई विशेष महत्व दिइनेछ ।
अन्य स्थानीय तहमा भने गाउँसभा नहुने भएको छ । मस्र्याङ्दी नदीमा आएको बाढीले सदरमुकामस्थित चामे गाउँपालिका, नासों गाउँपालिका र नार्पाभूमि गाउँपालिकाको गाउँसभा हुने छैन । मस्र्याङ्दीमा आएको बाढीले सबैभन्दा बढी नासों गाउँपालिकामा क्षति पुगेको छ । बाढीले गाउँपालिकाको भवन बगाएको छ ।
