संयुक्तराष्ट्र संघ, १३ असार । सुडानको डार्फरमा तैनाथ राष्ट्रसंघीय शान्ति सैनिकको म्याद अरु चार महिना थप्न सुरक्षा परिषदले स्वीकृति दिएको छ ।
राष्ट्रसंघ सुरक्षा परिषदले डार्फरमा युनामिडको म्याद आगामी अक्टोबर ३१ सम्म मात्र थप गरेको हो । यसअघि डार्फरमा तैनाथ शान्ति सेनाको म्याद एकएक वर्ष थप्ने गरिएको थियो । साथै, एक वर्षअघि शान्ति मिसनमा कार्यरत सैनिकको संख्या कटौती गर्ने निर्णय भए पनि त्यसलाई यथावत राखिएको छ ।
सन् २०१८ को जुलाईमा बसेको सुरक्षा परिषद बैठकले एक प्रस्ताव पारित गरी डार्फर मिसन सन् २०२० को जुन महिनाबाट हटाउन सक्ने निर्णय गरेको थियो ।
तर सुडानमा भएका पछिल्ला राजनीतिक घटनाक्रमले शान्ति मिसन बन्द गर्न वा शान्ति सेनाको संख्या कटौती गर्न निकै कठिन रहेको सुक्षा परिषदको प्रतिवेदनमा उल्लेख छ ।
गत अप्रिल ११ मा सुडानका राष्ट्रपति ओमार अल बासिरविरुद्ध राष्ट्रव्यापी प्रदर्शन तिब्र भएसँगै सेनाले नै बासिरलाई सत्ताच्यूत गरेपछि सुडानको स्थिति निकै कमजोर बनेको छ । अहिले संक्रमणकालीन सैनिक परिषदले मुलुकको शासन सञ्चालन गरिरहेको छ ।
सुडानमा तैनाथ शान्ति मिसनबाट सैनिक कटौती गर्न सुडानमा अन्तर्राष्ट्रिय रुपमै मान्यताप्राप्त सरकार गठन हुनुपर्ने राष्ट्रसंघीय सुरक्षा परिषदका स्थायी सदस्य राष्ट्रले बताएका छन् । (रासस/सिन्ह्वा)
