१३ पुस, याङ्गुन । म्यान्मारमा सक्रिय जातीय सशस्त्र समूहहरुले युद्धबिराम उल्लङ्घन गरी सरकारी सेनामाथि आक्रमण गरेको सेनाले जनाएको छ ।
गत साता सेनाले चार महिनाका लागि सङ्कटग्रस्त उत्तरी र पूर्वी क्षेत्रमा सबै सैन्य कार्यबाही स्थगन गर्ने घोषणा गरेको थियो । पर्यवेक्षकहरुका अनुसार सेनाको उक्त कदम निकै आश्चर्यजनक मानिएको छ ।
दशकौंदेखि सशस्त्र जातीय समूहसँग भइरहेको हिंसात्मक झडप रोक्ने उपायस्वरुप सेनाले जातीय समूहसँग वार्ता र युद्धबिरामका उपाय अबलम्बन गरेको छ ।
तर म्यान्मार सेनाले बिहीबार शान राज्यमा सक्रिय पृथकतावादी शान स्टेट आर्मी (एसएसए) ले आक्रमण गरेको जनाएको छ । “आक्रमणबाट केही सैनिकको हत्या भएको छ र घाइते केही सैनिकलाई उपचारका लागि अस्पतालमा भर्ना गरिएको छ ।”
प्रधानसेनापतिको कार्यालयले जारी गरेको विज्ञप्तिमा भनिएको छ, “युद्धबिरामको पालना गर्न सेना अझै पनि तयार छ र एसएसएबाट हुने आक्रमणलाई सोही अनुरुप जवाफ दिनेछ ।”
उक्त घटनका बारेमा एसएसएको कुनै प्रतिक्रिया प्राप्त भएको छैन ।
सेनाले युद्धबिरामको घोषणा गरेपनि म्यान्मारको सीमावर्ती क्षेत्रहरुमा परस्पर विरोधी सशस्त्र समूहबीच हिंसात्मक झडपहरु जारी छन् ।
पूर्वोत्तरको सबैभन्दा ठूलो जातीय सशस्त्र समूह ताउङ नेसनल लिबरेसन आर्मीका प्रवक्ता ब्रिगेडियर जनरल टार फोन क्याले परिस्थिति निकै जटिल रहेको बताउनुभयो । म्यान्मारको सेनासँग भएको युद्धबिरामको सम्मान गर्ने बताउँदै उहाँले सेना बिरुद्ध आफ्नो समूहले कुनै कारबाही नगरेको स्पष्ट गर्नुभयो ।
म्यान्मारका सीमावर्ती क्षेत्रमा बेलायतबाट ७० वर्षअघि स्वतन्त्रता प्राप्त गरेदेखि नै द्वन्द्व जारी छ । यहाँ विभिन्न सशस्त्र समूहले स्वतन्त्रता, पहिचान, स्रोतसाधन र भूगोलका निम्ति सङ्घर्ष गरिरहेका छन् । (रासस/एएफपी)
