१० भदौ, काठमाडौँ । नेपाल महिला सङ्घका संस्थापक अध्यक्ष स्व मङ्गलादेवी सिंहको २२ औँ स्मृति दिवसमा उहाँले नेपालको प्रजातन्त्र स्थापनाका लागि गर्नु भएको योगदानको स्मरण गरिएको छ ।
नेपाल महिला सङ्घ काठमाडौँ शाखाको आयोजनामा आज बिहान मङ्गलादेवीको शालिक रहेको स्थान शोभा भगवतीमा एक कार्यक्रमको आयोजना गरी उहाँको शालिकमा माल्यापर्ण गर्दै श्रद्धान्जलि अर्पण गरियो ।
कार्यक्रममा नेपाली काङ्ग्रेसका नेता प्रकाशमान सिंहले नेपाली महिलाको हक, अधिकारका लागि सधै आवाज उठाउने नेतृ मङ्गलादेवीले एकतन्त्रीय राणा शासन फाल्ने देखि प्रजातान्त्रिक आन्दोलनमासमेत महत्वपूर्ण योगदान गरेको चर्चा गर्नुभयो ।
नेता सिंहले संविधानले महिलाहरुलाई धेरै अधिकार दिएको भन्दै अधिकार सुनिश्चित गर्नका लागि महिलाहरु लड्नुपर्ने बेला आएको बताउनुभयो ।
नेता सिंहले दुईतिहाईको सरकारले जनताको समस्या समाधान गर्न नसकेको आरोप लगाउनुभयो ।
नेपाली काङ्ग्रेस काठमाडौँका सभापति सबुज (कृष्ण) बानियाँले महिलाको हक अधिकारका लागिमात्र नभएर गणेशमान सिंहलाई सर्वोच्च नेता बनाउन मङ्गलादेवी सिंहको ठूलो भूमिका रहेको बताउनुभयो ।
नेपाल महिला सङ्घ काठमाडौँका अध्यक्ष विष्णुदेवी पुडासैनीले महिला सङ्घ मङ्गलादेवी सिंहले देखाएको बाटोमा हिँड्नुपर्ने विचार व्यक्त गर्नुभयो ।
महिलाका हक, अधिकारलाई सुरक्षित बनाउनका लागि विसं २००४ साउन २४ गते मङ्गलादेवी सिंहको अध्यक्षतामा महिलाहरु भेला भई महिला सङ्घको स्थापना गरिएको थियो ।(रासस)
