काठमाडौँ । काठमाडौँको गौशालास्थित बागमती होटलमा एकजना युवती मृत अवस्थामा फेला परेकी छन् । ती युवती बुधबार दिउँसो होटलको कोठा नम्बर ३०८ मा मृत अवस्थामा फेला परेको प्रहरीले जनाएको छ ।
प्रहरीका अनुसार बुधबार दिउँसो ढोका नखुलेपछि स्थानीय जनप्रतिनिधिसहितको उपस्थितिमा कोठाको ढोका खोलेर हेर्दा युवतीको शव फेला परेको हो । कागेश्वरी मनोहरा नगरपालिका घर भएकी सुस्मिता खड्का मृत अवस्थामा भेटिएको जिल्ला प्रहरी परिसर काठमाडौँ स्रोतले जनाएको छ ।
घटनाबारे उपत्यका अपराध अनुसन्धान कार्यालय र जिल्ला प्रहरी परिसर काठमाडौँले अनुसन्धान गरिरहेको छ । गत पुस १६ मा उनी होटलमा पुगेको देखिएको छ । उनी स्नातक तह तेस्रो वर्षमा अध्ययनरत थिइन् ।
