१७ जेठ, दाङ । दाङ जिल्लाका किसानको खेतीयोग्य जमिनमा पोटास र फोस्फोरसको कमी भएको पाइएको छ ।
बुधबार भएको उपमहानगरस्तरीय निःशुल्क माटो परीक्षण शिविरमा किसानले ल्याएको खेतीयोग्य जमिनको माटो चेकजाँच गर्दा सो कमी पाइएको जिल्ला कृषि विकास कार्यालयका माटोविज्ञ दिगम्वर यादवले बताउनुभयो ।
“अधिकांश जमिनमा पोटासको मात्रा न्यून र फोस्फोरसको मात्रा ७५ प्रतिशत देखिएको छ, खेतीयोग्य जमिनमा पोटास र फोस्फोरस हाल्नुपर्ने देखिएकोछ” उहाँले भन्नुभयो ।
एकीकृत मलखाद व्यवस्थापन र अम्लीयपनाको सुधार स्वस्थ बाली उत्पादन र कृषि व्यवसायीकरणको आधार भन्ने मूल नाराका साथ दुई दिनसम्म शिविर आयोजना गरिएको थियो । तुलसीपुर उपमहानगर कृषि विकास शाखाले तुलसीपुरमा आयोजना गरेको शिविरमा ११४ जना किसानले माटो चेकजाँच गराएका थिए ।
माटो विज्ञ दिगम्वर यादवले माटोमा पोटास र फोस्फोरसको कमीका कारण बालीमा रोग लाग्ने, ढल्ने र उत्पादनमा कमी आउने बताउनुभयो । उहाँले किसानले खेती गर्दा आवश्यक मात्रामा पोटास र फोस्फोरसको प्रयोग गर्न सुझाव दिनुभयो । (रासस)
