काठमाडौँ । शान्तिप्रेमी राजा वीरेन्द्र शाहको २१औँ स्मृतिसभा गरिएको छ । वीरेन्द्र शान्ति प्रतिष्ठानले आज यहाँ आयोजना गरेको स्मृतिसभामा वीरेन्द्रको शालिकमा माल्यार्पण तथा उनले मुलुकको विकासमा पुर्याएको योगदानबारे समीक्षा गरिएको थियो ।
जागरण सञ्चारगृहका अध्यक्ष रञ्जित धमलाले प्रजातन्त्रका पक्षधर राजा वीरेन्द्रको शासनकालमा मुलुकलाई शान्ति क्षेत्र घोषणा गर्न गरिएका प्रस्ताव, जनमत सङ्ग्रह, प्रजातन्त्र पुनःबहाली जस्ता कार्यले उनी दूरदर्शी कूटनीतिज्ञ र विकासप्रेमी भएको विचार व्यक्त गरे ।
वीरेन्द्रले राष्ट्रप्रति गरेको योगदानको उच्च कदर गर्दै देशमा स्थायी शान्ति र राजनीतिक स्थायित्व राख्नु नै उनीप्रतिको सम्मान हुने उनले बताए । प्रतिष्ठानका अध्यक्ष शिवहरि खनालले विश्वशान्तिका ज्योति भगवान् बुद्ध जस्तै नेपालको शान्ति क्षेत्र र विकासका लागि राजा वीरेन्द्रको योगदान पनि उच्च रहेको बताए ।
यसैबीच राष्ट्रिय प्रजातन्त्र पार्टीले नारायणहिटी सङ्ग्रहालय अगाडि राजा वीरेन्द्रको २१औँ स्मरणमा दीप प्रज्वलन गरेको छ । पार्टीका केन्द्रीय सदस्य सरस्वती अधिकारीले देशभक्त र जनताप्रेमी राजा वीरेन्द्रको अभाव सधैँ खड्किरहेको भन्दै उहाँको प्रजातान्त्रिक आदर्शका साथै सम्पूर्ण सम्पत्तिको रक्षा गर्नु राज्यको दायित्व भएको बताए ।
पार्टीका नेता सुन्दर पाण्डेले वीरेन्द्रले शान्ति र विकासका निमित्त राष्ट्रलाई दिएको त्याग र योगदानको उच्च मूल्याङ्कन गर्नुपर्नेमा जोड दिए । विसं २०५८ जेठ १९ गते भएको दरबार हत्याकाण्डमा तत्कालीन राजा वीरेन्द्रको सपरिवारका साथै अन्य सदस्यसमेतको हत्या भएको थियो ।
