फाइल फोटो 
काठमाडौं । पूर्वराजा ज्ञानेन्द्र शाहले प्रजातन्त्र प्राप्तिको ७० वर्षपछि आएर पनि मुलुक अहिले प्रजातन्त्रकै विषयमा विवाद, द्वन्द्व र बहसमै व्यस्त र ग्रस्त भएको बताएका छन् । ‘७१ औं राष्ट्रिय प्रजातन्त्र दिवस’को पूर्वसन्ध्यामा आज विहीबार शुभकामना दिदै पूर्वराजा शाहले यस्तो धारणा राखेका हुन् ।
पूर्वराजा शाहले प्रजातन्त्र भनेको आवधिक निर्वाचन र दल विशेषका नेताहरुको शासन प्रणाली मात्र नभई सामाजिक जीवन पद्धति पनि भएकोले उनले हरेक नागरिकले प्राप्त गर्ने सन्तुलित खुशीमा मात्र प्रजातन्त्रको प्रण अटुट रहने पनि बताएका छन् ।
यस्तै उनले प्रजातन्त्रमा जनशक्ति र जनसम्मति नै विशिष्ट पक्ष भएको र जनताको आस्था, चाहना र जनभावना अन्ततः अमिर रहने बताउँदै यसलाई मेट्न खोजेर, बटारेर त्यो नबटारिने बताए । उनले शुभकामना दिंदै भनेका छन्, ‘यसमा राष्ट्रको प्रतिष्ठा बढाउन हामी कति समर्थ भएका छौं ? सबैले मातृभूमिको पवित्र माटो छातीमा राखेर आत्मसमीक्षा गर्नुपर्ने बेला आएको छ ।’
पूर्वराजा शाहद्वारा जारी शुभकामना विज्ञप्तिमा भनिएको छ, ‘नेपाल, जनता र राजाको सहमतिबाट खडा भएको र त्यसको अस्तित्व रक्षा पनि सहमतिबाट मात्रै हुने यथार्थको अवज्ञाले निषेध र विभेदको राजनीति शुरु गरिएकोमा मुलुक दिनप्रति दिन जटिलतामा फस्दै गएको महसुस आम नेपालीले गरिरहेका छन् ।’
