काठमाडौँ, १९ भदौ । अख्तियार दुरुपयोग अनुसन्धान आयोगले साविक दाँगपा गाविस तेह्रथुममा कार्यरत गाविस सचिव मणिप्रसाद राईले सामाजिक सुरक्षाभत्ता वितरणमा अनियमितता गरेको आरोपमा विशेष अदालतमा मुद्दा दायर गरेको छ । आयोगका अनुसार गाविस सचिव रहनुभएका राईले आफैँले ल्याप्चे लगाई रु दुई लाख नौ हजार ७०० बराबरको भ्रष्टाचार गरेको अनुसन्धानबाट खुलेको छ ।
नक्कली भर्पाई र कागजात तयार पारी तत्कालीन जिल्ला विकास समिति तेह्रथुमबाट भुक्तानी लिएको पाइएकाले बिगो असुल गरी कारवाहीको माग गर्दै विशेष अदालतमा मुद्दा दायर गरेको प्रवक्ता प्रदीपकुमार कोइरालाले जानकारी दिनुभयो ।
यस्तै आयोगले शहरी विकास तथा भवन डिभिजन विभाग डिभिजन कार्यालय काठमाडौँअन्तर्गतको बोलपत्रमा निर्माण व्यवसायीसँग कुनै सुरक्षणबापतको रकमसमेत नराखी ‘बिड वण्ड’ जारी गरेको अभियोगमा छ जनाविरुद्ध मुद्दा दायर गरेको छ ।
आयोगले राष्ट्रिय वाणिज्य बैंक शाखा कार्यालय चरिकोटका शाखा प्रबन्धक टीकाप्रसाद दुलालविरुद्ध रु छ लाख १० हजार बराबरको अनियमितता गरेको आरोपमा मुद्दा दायर गरेको छ । यस्तै सोही बैंक शाखा कार्यालय, चरिकोटका तत्कालीन प्रबन्धक नवराज खत्री तथा कर्जा इञ्चार्ज प्रह्लाद खड्काले पनि निर्माण व्यवसायी सोवर्ण/ब्रह्माणी जेभीले बैंकसँग ‘बिड वण्ड’ कारोवार गर्दा बैंकमा कुनै सुरक्षण नराखेको पाइएको छ । आयोगले उनीहरुविरुद्ध रु १४ लाख ८१ हजार बराबरको बिगो कायम गरी भ्रष्टाचार मुद्दा दायर गरेको छ ।
आयोगले शहरी विकास तथा भवन विभाग डिभिजन कार्यालय काठमाडौँका तत्कालीन डिभिजन प्रमुख इञ्जिनीयर बुद्धिसागर थापाले निर्माण व्यवसायीसँग मिलेमतो गरी ठेक्का सम्झौता भएको १० महीनाभन्दा बढी समयसम्म पनि निर्माण कार्य शुरु गर्न चाहिने बीमा नै नराखी नक्कली बण्ड राखी रु १२ लाख २७ हजार ४४० बराबरको भ्रष्टाचार गरेको आयोगको आरोप छ ।
आयोगले ब्रह्मायणी निर्माण सेवाका प्रबन्ध निर्देशक उमेशकुमार भण्डारी र सोवर्ण निर्माण सेवाका सञ्चालक अर्जुनबहादुर थापाले बैंकका कर्मचारीलाई प्रभावमा पारेर नक्कली काम गराएको अभियोगमा रु ३० लाख २२ हजार १०० बराबरको भ्रष्टाचार गरेको आरोपमा मुद्दा दायर गरिएको छ । आयोगका अनुसार उनीहरु सबैलाई बिगो असुल गरी कारवाहीको माग गरिएको आयोगले जनाएको छ । (रासस)
