१४ जेठ, विराटनगर । झापा जिल्लामा थप १७ जनालाई कोरोना भाइरस (कोभिड-१९) संक्रमण पुष्टि भएको छ । कोशी अस्पताल विराटनगरको प्रयोगशालामा परीक्षण गर्दा बुधबार दिउँसो १७ जनामा कोरोना संक्रमण पुष्टि भएको हो ।
आज कचनकवल गाउँपालिकामा १५ जना र गौरदह नगरपालिकामा २ जनामा कोरोना संक्रमण पुष्टि भएको हो । आज १७ जना थपिएसंगै झापामा कोरोना संक्रमितको संख्या ५४ पुगेको छ भने २ जना डिस्चार्ज भइसकेका छन् ।
साथै प्रदेश १ मा संक्रमितको संख्या १०४ पुगेको छ । संक्रमित सबैको स्वास्थ्य अवस्था सामान्य रहेको छ । उनीहरु चिकित्सकको निगरानीमा रहेका छन् ।
