वीरगञ्ज, साउन ३०। पर्सा जिल्लाको वीरगञ्जस्थित नारायणी अस्पतालको प्रयोगशालामा हिजो २९ गते बिहीबार राति गरिएको परीक्षणमा बारा, पर्सा र महोत्तरीका थप ४९ जनामा कोरोना भाइरस (कोभिड-१९) संक्रमण पुष्टि भएको अस्पताल स्रोतले जानकारी दिएको छ ।
कोरोना संक्रमण पुष्टि हुने ४९ जनामध्ये २६ जना पर्साका, १९ जना बाराको जितपुर सिमरा उपमहानगरपालिका, २ जना महोत्तरीको जलेश्वर नगरपालिका, १ जना बाराको विश्रामपुरका र १ जना वीरगन्जस्थित भारतीय महावाणिज्य दूतावासमा कार्यरत कर्मचारी रहेका छन् ।
पर्सा जिल्लाका २६ जना कोरोना संक्रमितमध्ये १२ जना नारायणी अस्पतालका चिकित्सक, स्वास्थ्यकर्मी र कर्मचारी रहेका छन् । नारायणी अस्पताल स्रोतका अनुसार १२ महिलासहित २ वर्षदेखि ६९ वर्ष उमेर समूहका ४९ जनामा कोरोना संक्रमण पुष्टि भएको हो ।
नारायणी अस्पतालको एनआईसीयू विभागका १ जना चिकित्सक, पोषण, फार्मेसी र फिजियोथेरापी विभागका १/१ जना स्टाफमा कोरोना संक्रमण पुष्टि भएको छ । अस्पतालका ३ जना स्विपर, ३ जना सुरक्षा गार्ड र १ जना कार्यालय सहयोगीमा पनि कोरोना संक्रमण पुष्टि भएको छ ।
४ जना संक्रमितमा खोकी र ज्वरोको लक्षण देखिएको छ । पैसा तिरेर स्वयम् परीक्षण गर्न आएका ६ जनामा कोरोना पुष्टि भएको छ । ग्लोबल आईएमई बैंकका १ जना कर्मचारीमा पनि कोरोना पुष्टि भएको छ ।
जितपुर सिमरा उपमहानगरपालिकाका १९ जना कोरोना संक्रमितमध्ये ६ जना वडा नम्बर २५ का र ३ जना संक्रमित वडा नम्बर ३ का स्थायी बासिन्दा हुन् । साथै अन्य कोरोना संक्रमित वडा नम्बर १५, १६, १७, १८, १९, २०, २१, २२, २३, २४ का स्थायी बासिन्दा रहेका छन् । जितपुरस्थित आर्मी ब्यारेकका १ जना सैनिकमा पनि कोरोना संक्रमण देखिएको छ ।
