फटाईं गरे अव पनि लागे हुन्छ पाखा

त्रिवेन्द्र तिम्सिना

गठवन्धनको नारा लिई आयौ गाउँघरतिर
हात जोड्दै भोट माग्यौ निहुर्याएर शिर
बिजयको माला लगाई छौ है कसम खाका
फटाईं गरे अव पनि लागे हुन्छ पाखा ।

फेरि पनि हुन सक्छ त्यै कुर्सीको खेल
सोझा साझा जनतामाथि वन्न सक्छ झेल
अस्थिरता नै बनाउन छन् है सलवलाका
फटाईं गरे अब पनि लागे हुन्छ पाखा ।

ख्याल राख्नु समयको वित्छ धेरै छिटो
त्यै बिचमा चलखेल हुन्छ बोकि पैसा विटो
दोहोरिने हुन् कि फेरि पुरानै ती भाका
फटाईं गरे अब पनि लागे हुन्छ पाखा ।

अब पनि भयो भने विश्वास माथी धोका
बन्द हुन्छन् जनतासँग आउने सबै ढोका
याद रहोस् जनताले छैनन् दुई छाक खाका
फटाईं गरे अब पनि लागे हुन्छ पाखा ।

सहने नि सीमा हुन्छ भयो अत्याचार
तिमीले नै दिनुपर्छ यो मुलुकलाई पार
आफू-आफू लडी फेरि खोज्ने हौ कि काख
फटाई गरे जनताले नै लगाउनेछन् पाखा ।

त्यागी बन समृद्धिलाई अब जुट्नुपर्छ
देशका लागि बाँच्न अनि मर्न सक्नुपर्छ
हस्तक्षेप हुन्छ भने बन्द गर नाका
नत्र भने देशै छोडी लागे हुन्छ पाखा ।।

*भौतिकशास्त्रमा स्नातकोत्तर तह (एमएस्सी) गरेका त्रिवेन्द्र तिम्सिना नेपालपत्रका लेखक हुन् । उनका लेखहरु साहित्यिक, बैज्ञानिक, अनुसन्धानात्मक र जानकारीमुलक हुन्छन ।