१८ चैत, काठमाण्डौ । नेपका एमाले र माओवादी केन्द्रका अध्यक्षले गत शनिबार नै दुवै कार्यदललाई चाडो प्रतिवेदन तयार गर्न निर्देशन दिएका थिए । अध्यक्षद्धयको निर्देशन बमोजिम कार्यदलका नेताहरुले हतारहतारमा रातारात प्रतिवेदन पनि तयार पारे ।
तर, प्रतिवेदन तयार भएको तीन दिन भयो । दुवै प्रतिवेदन कार्यदलका संयोजकसँग छन् ।
एमाले नेता माधव कुमार नेपाल नेतृत्वको कार्यदलले तयार पारेको राजनीतिक प्रतिवेदन र रामबहादुर थापा बादल नेतृत्वको कार्यदलले तयार पारेको विधान मस्यौदा कार्यदलको प्रतिवेदन शुक्रबार नै क्रमशः नेपाल र थापालाई बmुझाइएको दुवै कार्यदलका सदस्यहरुले बताएका छन् ।
‘हाम्रो कार्यदलले शुक्रबार नै प्रतिवेदन तयार पारेर संयोजकलाई दिएको हो, अव उहाँहरुले अध्यक्षलाई कहिले बुझाउनुहुन्छ हामीलाई थाहा भएन’ राजनीतिक प्रतिवेदन कार्यदलका सदस्य सुवास नेम्वाङले आइतबार रातोपाटीलाई बताए ।
उनले कार्यदललाई हतारहतारमा प्रतिवेदन तयार गर्न लगाएपनि प्रतिवेदन तयार भएपछि शीर्ष नेताले पार्टी एकताबारे सुस्तता देखाएको गुनासो गरे । भने ‘काम सकिइसकेको छ । जति ढिला गर्यो त्यति आशंका उव्जन थाल्छन् त्यसैले छिटो टुङग्यउनु राम्रो हुन्छ ।’
उता विधान मस्यौदा कर्यदलका सदस्य सुरेन्द्र पाण्डेले पनि कार्यदलले प्रतिवेदन तयार पारेर संयोजक थापालाई शुक्रबारै बुझाएको बताए । उनले प्रतिवेदन तयार भएपनि अरु काम शीर्ष नेताकै कारण रोकिएको बताए ।
‘हामीले हाम्रो जिम्मेवारी पुरा गर्यौ बाँकी काम उहाँहरुकै हो’ एमाले नेता समेत रहेका पाण्डेले भने ‘ अव प्रधानमन्त्रीको भारत भ्रमणअघि प्रतिवेदनको कारवही होला जस्तो देखिन्न ।’
कार्यदलले प्रतिवेदन तयार पारेपछि शीर्ष नेताले एकता संयोजन समितिको बैठक बोलाएर छलफल गर्ने र प्रतिवेदनमा नमिलेका केही कुरा सच्चाउने नेताहरुले बताएका थिए ।
तर, प्रतिवेदन तयार भएको ३ दिन वित्दा पनि शीर्ष नेताले एकता संयोजन समितिको बैठक बोलाएका छैनन् ।
‘एकता संयोज समतिको बैठक कहिले बस्ने भन्ने निश्चित भएको छैन । यसको टुङगो दुई दलका अध्यक्षले गर्ने हो । मैले बुझेअनुसार प्रधानमन्त्रीको भारत भ्रमणअघि समितिको बैठक बस्ने देखिदैन’ एकता संयोजन समितिका सदस्य तथा माओवादी नेता नारायणकाजी श्रेष्ठले बताए ।
नेपाल नेतृत्वको कार्यदलले करिब ४१ पृष्ठको प्रतिवेदन तयार पारेको छ भने थापा नेतृत्वको कार्यदलले १६ अध्याय र ७८ धाराको अन्तरिम विधान तयार पारेको थियो ।
यस अघि दुवै पार्टीका नेताहरुले प्रधानमन्त्री ओलीको २३ चैत्रबाट शुरु हुने भारतभ्रमण पूर्व नै एकता गर्ने बताएका थिए ।
तर, अव यो कोर्स सकिएको नेताहरुले नै बताएका छन् । अब दुई पार्टीवीच कम्युनिष्ट पार्टी स्थापना दिवसको अवसरमा बैशाख ९ गते पार्टी एकताको तयारी हुनेछ । संगठनमा कुन पार्टीको कति प्रतिशता सहभागीता गराउने भन्ने मतभेद चाहिँ अझै टुंगिएको छैन् ।-पाटोपाटी
