सन्दीप लामिछानेविरुद्ध पक्राउ पूर्जी जारी गर्ने बाटो खुल्यो Nepalpatra सन्दीप लामिछानेविरुद्ध पक्राउ पूर्जी जारी गर्ने बाटो खुल्यो
२० मंसिर २०७९, मंगलबार

सन्दीप लामिछानेविरुद्ध पक्राउ पूर्जी जारी गर्ने बाटो खुल्यो


सन्दीप लामिछाने

काठमाडौं । नेपाली राष्ट्रिय क्रिकेट टिमका कप्तान सन्दीप लामिछानेविरुद्ध पक्राउ पूर्जी जारी हुने भएको छ । लामिछानेविरुद्ध पक्राउ गर्न जिल्ला अदालत, काठमाडौंले अनुमति दिएको छ ।

जिल्ला अदालत, काठमाडौंले पक्राउ गर्न अनुमति दिएसंगै अब प्रहरीले लामिछानेलाई पक्राउ गर्ने बाटो खुलेको छ । अव उनलाई प्रहरीले कुनै पनि बेला पक्राउ गर्न सक्छ ।

एक १७ वर्षीया बालिकाले जबरजस्ती करणी गरेको भन्दै सन्दीपविरुद्ध बलात्कारको उजुरी दर्ता गरेकी छन् । प्रहरीले अनुसन्धानका लागि लामिछानेलाई पक्राउ गर्न अदालतसँग अनुमति मागेको थियो ।

लामिछानेले नेपाल क्रिकेट संघ (क्यान) लाई कानुनी उपचारमा सहयोग गर्न गुहारेका छन् । जबरजस्ती करणीको आरोपलाई अस्वीकार गर्दै उनले क्यानलाई कानुनी सहायताका लागि गुहारेका हुन् ।

सन्दीपलाई आरोप लागेको खबर सार्वजनिक भएपछि क्यान अध्यक्ष चतुर बहादुर चन्द हिजो बुधबार बेलुका काठमाडौँ आइपुगेपछि क्यानका पदाधिकारीसंग छलफल गरेका थिए । लामिछानेमाथि लागेको नाबालिका करणी आरोपका विषयमा क्यानले तत्काल केही छानबिन नगर्ने बताएको छ ।

क्यानका अध्यक्ष चतुरबहादुर चन्दले सन्दीपलाई आरोप मात्र लागेको र अनुसन्धानकै क्रममा रहेकाले यस विषयमा क्यानले तत्काल केही नगर्ने बताएका छन् । चन्दले कानुनी रुपमा पुष्टि नभइञ्जेल सन्दीपलाई निलम्बन वा कुनै पनि किसिमको कारबाही नगर्ने बताएका हुन् ।

महानगरीय प्रहरी वृत्त गौशालामा परेको जाहेरीमा स्याङ्जा आरुचौर स्थायी घर भई हाल काठमाडौँको बूढानीलकण्ठ बस्ने सन्दीपले बालिकालाई यही भदौ ५ गते काठमाडौँ र भक्तपुरका विभिन्न स्थानमा घुमाएको र सोही दिनको राति काठमाडौँको एक होटलमा ल्याएर जबर्जस्ती करणी गरेको आरोप लागेको छ ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !