५८० वर्षयताकै सबैभन्दा लामो अवधिको चन्द्रग्रहण आज लाग्दै Nepalpatra ५८० वर्षयताकै सबैभन्दा लामो अवधिको चन्द्रग्रहण आज लाग्दै
१४ मंसिर २०७८, मंगलबार

५८० वर्षयताकै सबैभन्दा लामो अवधिको चन्द्र ग्रहण आज लाग्दै


चन्द्रग्रहण

काठमाडौँ । आज मंसिर ३ गते सन् २०२१ को अन्तिम चन्द्रग्रहण लाग्दै छ । पछिल्लो ५८० वर्षमा पहिलो पटक सबैभन्दा लामो अवधिसम्म आज चन्द्रग्रहण लाग्नेछ । यो चन्द्र ग्रहण शताब्दीकै सबैभन्दा लामो चन्द्रग्रहण हो ।

यो चन्द्रग्रहण ३ घण्टा २८ मिनेट २४ सेकेन्ड लामो हुनेछ । यो पटकको चन्द्रग्रहणमा चन्द्रमाको ९७ प्रतिशत भाग ढाकिनेछ । दिउँसो करिब साढे १ बजे यो ग्रहण उच्च बिन्दुमा पुग्नेछ । यो ५ सय ८० वर्ष यताकै सबैभन्दा लामो अवधिको चन्द्रग्रहण हुनेछ ।

यसअघि सन् १४४० को फेब्रुअरी १८ मा सबैभन्दा लामो चन्द्रग्रहण लागेको थियो । यति लामो चन्द्र ग्रहण अब ८ फेब्रुअरी २६६९ मा मात्र लाग्नेछ । एसिया, अमेरिका, उत्तरी युरोप, अस्ट्रेलिया तथा प्रशान्त महासागरीय क्षेत्र लगायतबाट देखिने यो ग्रहण दिउँसो १ बजेर ३ मिनेटबाट दिउँसो ४ बजेर ३२ मिनेटसम्म रहनेछ ।

ज्योतिषशास्त्रमा चन्द्रग्रहणलाई निकै महत्त्वपूर्ण मानिन्छ । ज्योतिषशास्त्रका अनुसार जुन पूर्णिमा तिथीका दिन राहु अथवा केतुमा एक ग्रह चन्द्रमाको साथमा एकै राशिमा पर्न आउँछन् त्यस दिन चन्द्रग्रहण हुन्छ । धर्मशास्त्र अनुसार राहु र केतुले चन्द्रमालाई समाउँदा चन्द्रग्रहण लाग्ने गर्दछ ।

खगोल विज्ञान अनुसार सूर्य र चन्द्रमाको बीचमा पृथ्वी आउँदा एउटै सरल रेखामा परेको खण्डमा चन्द्रग्रहण लाग्ने गर्छ । चन्द्रग्रहण भनेको पृथ्वीको छायाँ चन्द्रमामा पर्नु हो । चन्द्रग्रहण पूर्णिमाको दिनमा मात्र लाग्दछ ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !