, आदित्यनाथ योगीले नेपाललाई धम्क्याउन खोज्नु अनुचित : प्रधानमन्त्री ओली

आदित्यनाथ योगीले नेपाललाई धम्क्याउन खोज्नु अनुचित : प्रधानमन्त्री ओली

नेपाल हेपिन मान्दैन : प्रधानमन्त्री ओली

काठमाडौँ, २८ जेठ । प्रधानमन्त्री केपी शर्मा ओलीले भारतको उत्तर प्रदेशका मुख्यमन्त्री आदित्यनाथ योगीले नेपाललाई धम्क्याउन खोज्नुभएको हो भने त्यो उचित नभएको बताउनुभएको छ । प्रतिनिधिसभाको बैठकमा आज विनियोजन विधेयक, २०७७ अन्तर्गत छलफलमा उठेका प्रश्नको प्रधानमन्त्रीले दिएको जवाफमा सांसद प्रेम सुवालले मुख्यमन्त्री योगीले नेपालले सीमा निर्धारण गर्दा परिणामबारे सोच्नुपर्ने र तिब्बतले गरेको गल्ती सम्झनुपर्ने धम्की किन दिए भनी स्पष्टीकरण माग गर्नुभएको थियो ।

जवाफको स्पष्टीकरणका सन्दर्भमा प्रधानमन्त्री ओलीले भन्नुभयो, “यदि त्यसरी बोलेको हो भने त्यो जायज होइन, नेपाललाई धम्क्याउन खोज्नुभएको हो भने त्यो उचित होइन, उहाँ भारतको केन्द्रीय सरकारको निर्णायक व्यक्ति पनि होइन, तैपनि मुख्यमन्त्रीका हिसाबले पनि बोलेको भए त्यो नबोलिनु पथ्र्याे ।”

उहाँले त्यसरी बोलेको भए त्यो आलोच्य र निन्दनीय विषय हो, त्यस्तो कुरालाई हामी नेपालमाथि अवहेलनाको विषयमा बुझ्छाँै भन्नुभयो । प्रधानमन्त्री ओलीले भन्नुभयो, “नेपाल हेपिन तयार छैन र हेपिन मान्दैन ।” बैठकमा आज प्रधानमन्त्रीले विनियोजन विधेयक, २०७७ अन्तर्गत प्रधानमन्त्री तथा मन्त्रिपरिषद्को कार्यालय, राष्ट्रिय योजना आयोगको सचिवालय, राष्ट्रपतिको कार्यालय एवं उपराष्ट्रपतिको कार्यालयका विभिन्न शीर्षकमाथिको छलफलमा उठेका प्रश्नको जवाफ दिनुभएको थियो ।

आज संसदमा बोल्दै प्रधानमन्त्री केपी शर्मा ओलीले नेपालका लिम्पियाधुरा, लिपुलेक र कालापानी क्षेत्र भारतले आफ्नो सेना राखेर कब्जा गरेको बताउँदै सरकारले तिनलाई कूटनीतिक माध्यमबाट फिर्ता लिने स्पष्ट पार्नु भएको छ । प्रधानमन्त्री केपी शर्मा ओलीले राष्ट्रियताका सवालमा मङ्गलबार प्रतिनिधिसभामा देखिएको अभूतपूर्व एकताप्रति गर्व महसुस भएको बताउनुभएको छ । विनियोजन विधेयक, २०७७ अन्तर्गत प्रधानमन्त्री तथा मन्त्रिपरिषद्को कार्यालय तथा सम्बन्धित निकायका शीर्षकमाथिको छलफलमा उठेका प्रश्नको जवाफ दिनुअघि प्रतिनिधिसभा बैठकमा उहाँले सभामा देखिएको असाधारण एकताले आजका राष्ट्रियता र कोभिड –१९ वा यसले उत्पन्न गरेका जटिलताको सामना गर्न हौसला प्रदान गरेको बताउनुभएको छ ।

यो पनि पढ्नुहोस्

राष्ट्रियताका सम्बन्धमा देखिएको एकताप्रति गर्व गर्छु : प्रधानमन्त्री ओली

अतिक्रमित भू-भाग कूटनीतिक आधारमा फिर्ता लिन्छौ : प्रधानमन्त्री ओली