काठमाडौँ। सत्तारुढ दल नेकपा (एमाले) का नेता तथा प्रधानमन्त्री केपी शर्मा ओलीका प्रमुख राजनीतिक सल्लाहकार विष्णु रिमालले राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानेन्द्र शाहीलाई नालायक भएको टिप्पणी गरेका छन् ।
सामाजिक संजाल फेसबुकमा आज बिहान लेख्दै राप्रपाका प्रमुख सचेतक समेत रहेका सांसद शाहीले लगाएको आरोप खण्डन गर्दै रिमालले ‘मलाई यस्ता नालायकहरूसँग सवाल-जवाफ गर्नु छैन’ भनेर लेखेका छन् ।
हिजो आइतबार पूर्वराजा ज्ञानेन्द्र शाहलाई त्रिभुवन अन्तर्राष्ट्रिय विमानस्थलमा स्वागत गर्ने क्रममा भारतको उत्तरप्रदेशका मुख्यमन्त्री योगी आदित्यनाथको फोटो प्रधानमन्त्री ओलीको निर्देशनमा राख्न लगाएको आरोप लगाएपछि रिमालले शाहीको जवाफ फर्काएका हुन् ।
रिमालले काक्रा चोरहरूले पहिला काक्रा चोर्ने र खाने अनि पोल खुल्ने डरमा हत्तपत्त अर्काको गालामा बियाँ टाँसी कुलेलम ठोक्छन् भनेर एउटा व्यंग गरेका छन् । त्यस्तै उनले दलालहरूले पहिले दलाली गर्ने दलालीको पोल खुलेपछि खाल’ जोगाउन त्यस्तै हर्कत गर्ने अर्को टिप्पणी गरेका छन् ।
उनले डिसईन्फरमेसनको सहारामा संयोगवश मर्यादित स्थानमा पुगेका अयोग्यहरूबाट फैलाईने भ्रम यस्तै भएकोले यी मानिस कति द्विविधामा भ्रमको खेती गर्दै थिए भन्ने कुरा एउटै स्ट्याटस ५/५ चोटी एडिट गरेको हिस्ट्रीले आफैं बताउँने भन्दै मलाई यस्ता नालायकहरूसँग सवाल-जवाफ गर्नु छैन तर कसले कहाँ के गर्दैछ भनेर समाचार त आएकै छ भनेर उनले लेखेका छन् ।
यो पनि पढ्नुहोस्
प्रधानमन्त्रीको निर्देशनमा आदित्यनाथको फोटो राख्न लगाइएको ज्ञानेन्द्र शाहीको दावी
